दहिवडीत लाखोंची घरफोडी; फ्लॅट फोडून पाच तोळे सोन्याच्या दागिन्यांची चोरी

दहिवडी (सातारा) : येथील एकतानगरमध्ये पुन्हा घरफोडी झाली असून, मध्यरात्री चोरट्यांनी बंद फ्लॅट फोडून अडीच लाख रुपयांचे दागिने लंपास केले. दरम्यान, दुसऱ्या घटनेत पांगरीजवळ आज दुपारी तीन वाजता रस्त्यात मागून येऊन मोटारसायकलवरील चोरट्यांनी दुसऱ्या मोटारसायकलस्वाराच्या हातातील मोबाईल हिसकावून धूम ठोकली.

याबाबत दहिवडी पोलिस (Dahiwadi Police) ठाण्यातून व प्रत्यक्ष मिळालेली माहिती अशी, एकतानगरमधील शारदा अपार्टमेंटमध्ये कार्तिकी देशमाने या राहतात. दोन दिवसांपूर्वी त्या गावी गेल्या होत्या. काल रात्री चोरट्यांनी त्यांच्या बंद दरवाजाचे कुलूप तोडून घरात प्रवेश करून गंठण, अंगठी, चेन, कानातले असे एकूण पाच तोळे सोन्याचे दागिने असा सुमारे अडीच लाखांचा ऐवज लांबवला.

दुसऱ्या घटनेत राहुल नारायण काळे (रा. लोणी, ता. खटाव) हे बारामती येथून दहिवडीकडे येताना पांगरी गावाजवळ थांबले. त्याचवेळी तोंडावर रुमाल बांधलेल्या मागून आलेल्या दोघांनी त्यांचा मोबाईल हिसकावून घेतला व काही समजण्याच्या आत तेथून धूम ठोकली. दिवसाढवळ्या झालेल्या या लूटमारीने प्रवासी हादरले आहेत. एकतानगरमध्ये गेल्या वर्षभरात अनेक घरफोड्या झाल्या आहेत, तर कित्येक प्रयत्न फसले आहेत. सतत होणाऱ्या घरफोड्यांमुळे एकतानगरचे नागरिक त्रस्त झाले आहेत. बंद घरे हे या चोरट्यांचे लक्ष असते. याच परिसरात होणाऱ्या घरफोड्या हे चिंतेचे कारण बनले आहे. चोरटे सराईत व परिसरातच राहणारे असावेत, असा संशय व्यक्त होऊ लागला आहे.