सैदापुरातील सासवे कुटुंबातील तीन चिमुकल्यांचा मृत्यू; अन्नातून विषबाधा झाल्याचा अंदाज

क-हाड : सैदापुर (ता कराड) येथे एकाच कुटुंबातील सख्या तीन बहिणींचा अकाली मृत्यू झाला आहे. कुटंबियासमवेत एकत्रित जेवण झाल्यानंतर गुरुवारी रात्री उशिरा संबधीत तीन मुलींसह आईला उलट्या व जुलाबाचा त्रास सुरू झाला. यातील तीन मुलींना जास्त त्रास झाल्याने त्यांचा मृत्यू झाला. या तिन्ही मुलींना कृष्णा हॉस्पिटलमध्ये उपचारासाठी दाखल करण्यात आले होते. त्यादरम्यान त्यांचा मृत्यू झाला. तिन्ही मुलींच्या अकाली मृत्यूमुळे हळहळ व्यक्त होत आहे. सासवे कुटुंबाला मोठा धक्का बसला आहे.

आयुषी शिवानंद सासवे (वय तीन), आस्था शिवानंद सासवे (वय नऊ), आरुषी शिवानंद सासवे (वय आठ) अशी मृत्यू झालेल्या मुलींची नावे असल्याचे पोलिसांनी सांगितले. हे कुटुंब सैदापुर येथील मिल्ट्री होस्टेल नजीक वास्तव्यास आहे.

काबाडकष्टाने पिकवलेल्या पपईला मिळतोय कवडीमोलाचा भाव; सातारा जिल्ह्यातील शेतकरी अक्षरशः रडकुंडीला

दरम्यान मृत्यू झालेल्या मुलींचा व्हिसेरा राखून ठेवण्यात आला आहे. तो पुण्यातील प्रयोगशाळेत तपासणीसाठी पाठवण्यात येणार आहे. अन्नातून विषबाधा झाली असावी असा प्राथमिक अंदाज व्यक्त होत आहे. सहाय्यक पोलीस निरीक्षक राहुल वरोटे घटनेचा तपास करीत आहेत.

Edited By : Siddharth Latkar