महाबळेश्वर तापोळा रस्त्यावर अपघात! तीन शिक्षक गंभीर जखमी

कास (सातारा): महाबळेश्वर तापोळा रस्त्यावर सकाळी चालकाचा ताबा सुटल्याने कार दरीत कोसळून अपघात झाला. यात तीन शिक्षक गंभीर जखमी झाले असून त्यांना पुढील उपचारासाठी वाई येथे हलविण्यात आले आहे.

तापोळा अतिवृष्टीमुळे खराब झालेले रस्ते एक महिना उलटून गेला तरी दुरूस्त झाले नाही. दुरुस्तीचे काम अर्धवट टाकून फक्त कामांवर कब्जा मिळवण्याची ठेकेदार यांची स्पर्धा सुरु आहे. मात्र सामान्य जनतेला त्रास सहन करावा लागत आहे.

आज सकाळी खांबील गोल येथील शाळेकडे तापोळ महाबळेश्वर रोडवरुन निघालेल्या प्राथमिक शाळेच्या शिक्षकांच्या चार चाकी कारच्या चालकाचा ताबा सुटल्याने अपघात झाला. कार खचलेल्या दरीत पलटी झाली. कारमधील वाळणे शाळेचे शिक्षक अंकुश टेबरे, आवळण शाळेचे विलास आवळे आणि वेंगळे शाळेचे राजेंद्र पिसाळ हे जखमी झाले असून जखमी शिक्षकांना तळदेव प्राथमिक आरोग्य केंद्रात तात्पुरता उपचार करून पुढील उपचारासाठी वाई येथे हालविण्यात आले आहे.