सातारा : अडीचशे किलोमीटरचा सायकल

कऱ्हाड : सह्याद्री व्याघ्र प्रकल्पाचे क्षेत्र संचालक म्हणुन वनसंरक्षक नानासाहेब लडकत यांनी आज पदभार स्वीकारला. त्यासाठी त्यांनी अंबर दिव्याची गाडी, थाटमाट टाळुन पुणे ते कोल्हापुर तब्बल २५० किलोमीटरचा सायकल प्रवास करून पदभार स्वीकारला. त्यांचा हा उपक्रम कौतुकाचा विषय ठरला आहे.

सह्याद्री व्याघ्र प्रकल्पाचे क्षेत्र संचालक समाधान चव्हाण हे निवृत्त झाले. त्यांच्या निवृत्तीनंतर सहाय्यक विभागीय आयुक्त दर्जाचे अधिकारी वनसंरक्षक नानासाहेब लडकत यांनी आज सह्याद्री व्याघ्र प्रकल्पाचे क्षेत्र संचालक म्हणुन पदभार स्वीकारला. ते महाराष्ट्र वनसेवेत 1986-87 च्या बॅचमध्ये रुजू झाले. मेळघाट व्याघ्र प्रकल्पात कामाची सुरवात केली. तर संजय गांधी राष्ट्रीय उद्यान येथेही ते सहायक वनसंरक्षकपदी होते. भारतीय वन सेवेत 2006 साली पदोन्नती मिळाली आहे. लडकत यांनी यापूर्वी जगप्रसिध्द ताडोबा व्याघ्र प्रकल्पाचे उपसंचालक म्हणून प्रभावीपणे काम केले आहे. कोल्हापूरला पदभार स्वीकारण्यापूर्वी ते पुणे वन कार्यालयात कार्यरत होते. त्यांचे येथे उपसंचालक उत्तम सावंत, सहाय्यक वनसंरक्षक सुरेश साळुंखे, वनक्षेत्रपाल संदीप कुंभार, बाळकृष्ण हसबनीस, मानद वन्यजीव रक्षक रोहन भाटे , मानद वन्यजीव रक्षक अजित पाटील, क्रीएटीव्ह नेचर फ्रेंड्स चे नाना खामकर, हेमंत केंजळे यांनी त्यांचे स्वागत केले आहे.