शरद पवारांनी माझी स्टाइल मारली, त्याला मी काय करणार? 'कॉलर उडवायच्या स्टाइल'वर उदयनराजेंचं मिश्किल उत्तर

सातारा : खासदार उदयनराजे भोसले (Udayanraje Bhosale) यांनी बावधनच्या बगाड यात्रेस (Bavdhan Bagad Yatra) भेट देऊन दर्शन घेतले. या वेळी त्यांनी उमेदवारीबाबत भाजपकडून (BJP) फसवाफसवीचे राजकारण होत नाही ना, या प्रश्नावर मिस्कीलपणे उत्तर दिले. फसवाफसवी पिक्चर बघा म्हणजे सगळं कळेल, असे उदयनराजेंनी स्पष्ट केले.

दरम्यान, जातीजातीत तेढ निर्माण होऊ नये, प्रत्येकाने जबाबदारीने बोलले पाहिजे, तसेच आपली परंपरा टिकण्यासाठी बावधनच्या बगाडाची परंपराही टिकली पहिजे, असेही त्यांनी नमूद केले. बावधन (ता. वाई) येथील बगाड यात्रा होती. या यात्रेतील बगाड्याच्या दर्शनासाठी खासदार उदयनराजे भोसले तेथे गेले होते. या वेळी त्यांच्याशी पत्रकारांनी संवाद साधला.

तुम्ही बगाडाकडे काय मागणं घातलं, या प्रश्नावर उदयनराजे म्हणाले, ‘‘आपण सर्वांनी बंधुभावाने राहिले पाहिजे. छत्रपती शिवाजी महाराजांचे विचार आचरणात आणले पाहिजेत, तरच या देशाची परंपरा अबाधित राहणार आहे. प्रत्येक जण काहीतरी बोलत असतो. देशाला अखंड ठेवायचे असेल तर छत्रपती शिवाजी महाराजांची संकल्पना अबाधित राहिली पाहिजे. हाताची पाच बोटे एकसारखी नसतात. त्याप्रमाणे प्रत्येकाचे विचारही वेगवेगळे असतात. पक्ष बाजूला ठेवा. प्रत्येकाने जबाबदारीने बोलले पाहिजे. जातीजातीत तेढ निर्माण होऊ नये, म्हणून सर्वांनी जबाबदारीने बोलले पाहिजे, तसेच प्रत्येकाने स्वत:च्या अंत:करणातून बोलले पाहिजे.

बावधनच्या बगाडाची परंपरा टिकली पहिजे. प्रत्येकाचा शेवट होत असतो. श्वास कधी थांबेल हे कोणीही सांगू शकत नाही. त्यामुळे आयुष्यात लोकांच्या हिताचे काम केले पाहिजेत ही माझी प्रमाणिक इच्छा आहे.’’ भारतीय जनता पक्ष तुमच्याशी फसवाफसवीचे राजकारण करत नाही ना? लोकसभेच्या उमेदवारीबाबत राजघराण्याला लांब ठेवले जातंय का, या प्रश्नावर उदयनराजे म्हणाले, ‘‘हा बगाडाचा विषय आहे. यामध्ये राजकारण आणू नये. फसवाफसवी हा पिक्चर आहे. तो बघा म्हणजे सगळं कळेल.’’

ते पवारसाहेब आहेत...

राष्ट्रवादी काँग्रेसचे खासदार शरद पवार यांनी तुमची कॉलर उडवायची स्टाइल केली होती. त्यावर उदयनराजेंना विचारले असता ते म्हणाले, ‘‘ते पवार साहेब आहेत.’’ माझी स्टाइल मारली त्याला मी काय करणार, असेही त्यांनी स्पष्ट केले.