Vardhangad Fort : किल्ले वर्धनगडावरील अनधिकृत बांधकाम हटवले; पोलिस बंदोबस्तात मध्यरात्री अचानक कारवाई

पुसेगाव : खटाव तालुक्यातील किल्ले वर्धनगडावर (Fort Vardhangad) राखीव वनक्षेत्रावर करण्यात आलेले अनधिकृत बांधकाम काल अचानक हटविण्यात आले. कमालीची गुप्तता पाळत वन विभागाने अनधिकृत बांधकाम हटविण्याची कारवाई केली.

यावेळी प्रचंड मोठा पोलिस बंदोबस्त ठेवण्यात आला होता. किल्ले वर्धनगडावर असलेल्या वनविभागाच्या राखीव क्षेत्रात करण्यात आलेले अनधिकृत बांधकाम हटविण्यात यावे, अशी मागणी जिल्हाधिकाऱ्यांकडे करण्यात आली होती.

मंगळवारी पहाटे पोलिसांच्या बंदोबस्तात वनविभागाच्या अधिकाऱ्यांनी अनधिकृत बांधकाम हटविण्याची कार्यवाही सुरू केली. कायदा व सुव्यवस्था राखण्यासाठी गडावर जाणारे सर्व रस्ते बंद करण्यात आले होते. सूर्योदय होताच पावणेसात वाजता कारवाई सुरू करण्यात आली.

सकाळी साडेआठ वाजेपर्यंत रेकॉर्डवर नसलेले अनधिकृत बांधकाम हटविण्याची कार्यवाही पूर्ण करण्यात आली. किल्ले वर्धनगडावरील अनधिकृत बांधकाम हटविण्याची तयारी मध्यरात्रीपासूनच करण्यात आली होती. पहाटेपासूनच गडावर जाणाऱ्या सर्व रस्त्यांवर पोलिस बंदोबस्त तैनात करण्यात आला होता.

दोन अधिकारी, ३२ कर्मचारी, दोन स्ट्रायकिंग फोर्स तुकड्या आणि वनविभागाचे अधिकारी, कर्मचारी कारवाईवेळी उपस्थित होते. यावेळी गडावर भाविकांसह सर्वांनाच प्रवेशबंदी करण्यात आली होती. प्रसिद्धी माध्यमांनाही मज्जाव करण्यात आला होता. मंगळवारी दिवसभर गडावर कुणालाही प्रवेश देण्यात आला नाही.