निवडणुकीत उंडाळकर गटाची बाजी; माजी मुख्यमंत्र्यांच्या गटाचा पराभव

कऱ्हाड (सातारा) : तालुक्यातील पाच ग्रामपंचायतीच्या पोटनिवडणुकीचा (Gram Panchayat by-election) निकाल आज जाहीर झाला. त्यातील कऱ्हाड दक्षिणमधील तीन ग्रामपंचायतींचा समावेश असून त्यापैकी दोन ठिकाणी उंडाळकर गटानं, तर एका ठिकाणी भोसले गटानं विजय मिळालाय. तर कऱ्हाड उत्तरमधील दोन निवडणुकीत राष्ट्रवादी कॉंग्रेसचे (Nationalist Congress Party) उमेदवार विजयी झाले आहेत. विजयानंतर कार्यकर्त्यांनी फटाक्यांची आतषबाजी करत गुलालाच्या उधळणीत जल्लोष केला.

कोळे ग्रामपंचायतीच्या पोटनिवडणुकीत उंडाळकर गटाची (Undalkar Group) सत्ता आलीय. तिथं भाजपचे अतुल भोसले यांच्या गटाकडून निवडूण आलेले प्रदीप पाटील यांचे निधन झाल्याने रिक्त जागेवर पोटनिवडणूक लागलेली होती. यामध्ये भोसले गटाकडे असलेल्या या जागेवर पोटनिवडणुकीत उंडाळकर गटाने बाजी मारली आहे. त्यामुळं आता सर्वच्या सर्व जागा उंडाळकर गटाकडे असून एकहाती सत्ता आहे. अकाईचीवाडीत ग्रामपंचायतीच्या (Akaichiwadi Gram Panchayat) पोटनिवडणुकीत उंडाळकर गटाला यश मिळालंय. बाळू विठू शेवाळे हे विजयी झाले. तुळसण येथे माजी मुख्यमंत्री पृथ्वीराज चव्हाण (Prithviraj Chavan) यांच्या गटाचा पोटनिवडणुकीत पराभव झालाय. तुळसण ग्रामपंचायतीची यापूर्वीची पंचवार्षिक निवडणूक दोन्ही गटांनी एकत्रित येत बिनविरोध केलेली होती. मात्र, बाबासोा वीर यांच्या निधनानं रिक्त झालेल्या जागेवर पोटनिवडणूक लागली होती.

यामध्ये अतुल भोसले गटाचे सर्जेराव पांडुरंग वीर हे विजयी झाले. विजयी उमेदवार सर्जेराव वीर हे पूर्वीचे सदस्य असलेले बाबासोा वीर यांचे चुलते आहेत. त्यामुळं पुतण्याच्या निधनानं रिक्त झालेल्या जागेवर चुलत्यांनी विजय मिळविला. कालगांव ग्रामपंचायतीत (Kalgaon Gram Panchayat) पोटनिवडणुकीत पालकमंत्री बाळासाहेब पाटील यांच्या राष्ट्रवादीचे पक्षाचे प्रदीप सर्जेराव चव्हाण हे विजयी झाले. भवानवाडी येथे ग्रामपंचायतीत पोटनिवडणुकीत पालकमंत्री पाटील यांच्या राष्ट्रवादीचे पक्षाचे वैशाली विनोद यादव या विजयी झाल्या. विजयानंतर समर्थक कार्यकर्त्यांनी फटाकांची आतषबाजी करत गुलालाच्या उधळणीत जल्लोष केला.