अमेरिकेच्या राजदूतांची तापोळ्याला भेट; परिसरातील निसर्गसौंदर्याने घातली भुरळ

कास : सध्या भारताच्या दौऱ्यावर असलेले अमेरिकन राजदूत डेव्हिड रेंज व त्यांचा मुलगा नोव्हा हे तापोळा येथील निसर्गसौंदर्याने प्रभावित झाले. या निसर्गाच्या सानिध्यात त्यांनी बराच वेळ घालवला.

कोयना धरणामुळे जावळी खोऱ्यातील कंदाटी, कोयना, सोळशी भागातील शिवसागर जलाशयामुळे येथील निसर्गसौंदर्य खुलून गेले आहे. उन्हाळ्याची चाहूल लागताच अनेक देशी-विदेशी पर्यटक तापोळा-बामणोली, आरव, वासोटा किल्ला आदी भागाला भेट देतात. जागतिक वारसा लाभलेल्या कास पुष्प पठार व त्याच्या जोडीला असलेला बामणोली-तापोळा हे पर्यटनस्थळे सध्या लोकप्रियतेच्या शिखरावर आहेत.

अमेरिकेच्या राजदूतांनी बोटिंग व फोटोसेशन करून येथील निसर्गसौंदर्य व सनसेट कॅमेरात कैद केला. विशाल बोट क्लबचे अध्यक्ष सुभाष कारंडे व मान्यवरांनी त्यांचे भारतीय संस्कृतीनुसार स्वागत केले. महाबळेश्वर व प्रतापगड किल्ल्याची पाहणी करून अमेरिकेचे राजदूत मायदेशी जाणार आहेत. तत्पूर्वी त्यांनी शिवसागर जलाशय व परिसराचे कौतुक केले. राज्याचे मंत्री व येथील भूमिपुत्र एकनाथ शिंदे, खासदार डॉ. श्रीकांत शिंदे, आमदार मकरंद पाटील यांनी पर्यटन विकास करण्यासाठी पर्यटनमंत्री आदित्य ठाकरे यांच्या मार्गदर्शनाखाली प्रयत्न सुरू केले आहेत. त्याला यश मिळाल्याची भावना येथील व्यावसायिक व सामाजिक कार्यकर्ते राजेंद्र कांबळे, संतोष मालुसरे, राजू ढेबे व विठ्ठल धनावडे यांनी व्यक्त केली आहे.