सातारा : "थर्टी फर्स्ट' च्या सेलिब्रेशनची गावा गावांत तयारी; भजन, कीर्तनाचेही उपक्रम

सायगाव (जि. सातारा) ः सरत्या वर्षाला निरोप व नवीन वर्षाच्या स्वागताला अवघा एक दिवस उरला आहे, तर कोरोनामुळे गेले नऊ महिने शांततेत गेल्यामुळे शहरी भागाप्रमाणे ग्रामीण भागातील तरुणाईने सेलिब्रेशनची जोरदार तयारी सुरू केली आहे. सध्या वेगवेगळ्या कार्यक्रमांचे आयोजन, पार्ट्यांचे नियोजन सुरू असल्याचे ग्रामीण भागात दिसते.
 
शहराप्रमाणे ग्रामीण भागातही मोठ्या प्रमाणात थर्टी फर्स्ट साजरा केला जातो. शेतामध्ये, फार्महाउस आदी ठिकाणी त्याचे आयोजन करून जोरदार तयारी चालू आहे. ढाबे, हॉटेल, बार या ठिकाणी सजावट, रंगरंगोटी केली जात आहे, तर आकर्षक विद्युत रोषणाई, डिजिटल बॅनर, बैठक व्यवस्था आदी नियोजनावर भर दिला जात आहे. काही ठिकाणी संगीतमय वातावरणासाठी ऑर्केस्ट्राचेही नियोजन केले आहे. या काळात मद्य, मटण, चिकनचा मोठ्या प्रमाणात फडशा पडणार आहे. कारण गेले नऊ महिने कोणत्याही प्रकारे तरुण वर्गाला एन्जॉय करता न आल्याने आता आलेली संधी त्यांना वाया घालवायची नाही, असे नियोजन ठरलेले आहे.

याला म्हणायचं विश्वास! तहसीलदार, डीवायएसपीची मुले शिकणार सरकारी शाळेत 
 
काही गावांत वारकरी सांप्रदायिक मडळांची नवीन वर्षाच्या स्वागतासाठी वेगळी तयारी चालू आहे. भजन, कीर्तन, ग्रंथ वाचन अशा प्रकारचे सोशल डिस्टन्स ठेवून कार्यक्रमांचे आयोजन केले आहे. काही गावातील तरुण वर्ग नवीन वर्ष हे गुढीपाडवा असल्याने शांत आहेत, तर काही तरुण हे सरत्या वर्षात गावागावांत प्रबोधनपर कार्यक्रमांचे नियोजन करून स्वच्छता अभियान राबविण्याच्या तयारीत आहेत. मात्र, या सर्वांवर पोलिस यंत्रणेचीही करडी नजर असणार आहे.

माण तालुक्यात बिनविरोधला तिलांजली; स्थानिक गटांतच रंगणार लढती 

सरत्या वर्षाला निरोप देताना आजच्या तरुण पिढीने गावगावांत प्रबोधन कार्यक्रमाचे नियोजन करून नाचगाण्यासारखे हिडीस प्रकार टाळून होणारा वायफळ खर्च विधायक कामांसाठी घालवावा किंवा कोरोनामुळे उद्‌ध्वस्त झालेल्या कुटुंबांना मदत करावी. 

- अनुकूल चिकाटे, सामाजिक कार्यकर्ते

संपादन - सिद्धार्थ लाटकर