'ड्रग्ज रॅकेटशी संबंध नाही, ख्यालीखुशालीसाठी केनियातून मला फोन आले'; वाई हत्याकांडातील ज्योतीचा उलटतपास सुरु

सातारा : सातारा जिल्ह्यातील गाजलेल्या वाई हत्याकांड सुनावणीत माफीची साक्षीदार ज्योती मांढरेवर अनेक आरोप करण्यात आले. बुधवारी झालेल्या उलटतपासामध्ये ज्योतीने सर्व आरोप फेटाळत वस्तुस्थिती सांगितली. दरम्यान, या खटल्याची आज (ता. 25) पुन्हा सुनावणी होणार असून उलटतपास सुरूच राहणार आहे.

सरकार पक्षातर्फे विशेष सरकारी वकील म्हणून ऍड. उज्ज्वल निकम यांची नियुक्ती आहे. त्यांना ऍड. मिलिंद ओक सहकार्य करत आहेत. या खटल्याची सध्या माफीची साक्षीदार असलेली ज्योती मांढरे हिचा उलटतपास सुरू आहे. संशयित आराेपी डाॅ. संताेष पाेळ यांच्या वतीने ऍड. श्रीकांत हुडगीकर हे काम पाहत आहेत. गेल्या चार सुनावण्यांपासून ज्योतीचा उलटतपास सुरू आहे. आजही पुन्हा उलट तपासाला सुरुवात झाली. यावेळी बचाव पक्षाच्या वतीने न्यायालयात ज्योतीला थेट तिचे केनिया देशाशी संबंध असून ती ड्रग्जचे रॅकेट चालवत असल्याचा आरोप करण्यात आला. हे आरोप ज्योतीने खोडून काढले. 

कर्मचारी कोरोनाबाधित आढळल्याने बॅंक ऑफ महाराष्ट्रचे व्यवहार बंद

ज्योतीचे नातेवाईक केनियात असून ख्यालीखुशालीसाठी केनियामधून फोन आले असल्याचा दावा तिने केला. बचाव पक्षातर्फे ज्योतीवर आणखी दोन खुनाचे आरोप करण्यात आले. त्यावरही ज्योतीने न्यायालयात मुद्देसूद माहिती दिली. सध्या कोरोना संसर्गामुळे वाई हत्याकांड सुनावणीव्यतिरिक्त कोणालाही प्रवेश दिला जात नाही. 

Edited By : Siddharth Latkar