वाई-धोम खून खटल्यातील मुख्य संशयित आराेपी संताेष पाेळला न्यायालयाने खडसावले

सातारा : वाई-धोम खून सत्रातील मृत मंगल जेधे व माफीची साक्षीदार ज्योती मांढरे (Jyoti Mandhare) या दोघींमध्ये 8 दिवसांत तब्बल 31 तास बोलणे, तसेच मेसेज झाल्याचे उलट तपासात समोर आले. दरम्यान, मुख्य संशयित संतोष पोळ (Santosh Pol) याने कारागृहामधून अर्ज न करता वकिलांच्या माध्यमातून न्यायालयासमोर थेट तक्रारी मांडण्यास न्यायालयाने सांगितले. 

वाई-धोम खून सत्राच्या खटल्याची सध्या जिल्हा न्यायालयात सुनावणी सुरु आहे. त्यामध्ये माफीची साक्षीदार ज्योती मांढरे यांचा उलट तपास सुरू आहे. गुरुवारी नियमितपणे त्याला सुरवात झाली. या वेळी झालेल्या उलटतपासामध्ये मंगल जेधे व माफीची साक्षीदार मांढरे यांचे आठ दिवसांत तब्बल 31 तास फोनवर बोलणे झाल्याचे समोर आले. याबाबत पोलिसांनी जे सीडीआर न्यायालयात दाखल केले आहेत त्यातून ही बाब समोर आली. त्यांच्यामध्ये मेसेजही झाल्याचे न्यायालयात समोर आले.
 
दरम्यान, कथीत डॉ. पोळ जेलमधून वारंवार तक्रार अर्ज करत असल्याने न्यायाधीशांनी त्याबाबत सुनावले. प्रत्येक सुनावणीसाठी तुम्हाला साताऱ्यात आणले जाते. व्हिडीओ कॉन्फरन्सिंगही होते. तेव्हा तुम्ही तक्रार करत नाही. कारागृहातून मात्र, तक्रार अर्ज करत असता आता इथून पुढे तुम्ही थेट वकिलांच्या माध्यमातून तक्रार द्या, असे न्यायाधीशांनी पोळला सुनावले. या वेळी विशेष सरकारी वकील उज्ज्वल निकम (Ujjwal Nikam) , संशयित पोळ, माफीची साक्षीदार ज्योती मांढरे, बचाव पक्षाचे वकील ऍड. श्रीकांत हुटगीकर न्यायालयात उपस्थित होते. उद्या पुन्हा न्यायालयात सुनावणी होणार आहे.

मराठा आरक्षणाचा अंतिम लढा छत्रपतीं च्या नेतृत्वाखाली व्हावा; शिवेंद्रसिंहराजेंची भावना

Edited By : Siddharth Latkar