iPhone 14 Saves Life : 400 फूट खोल दरीत कोसळली कार; 'आयफोन'च्या खास फीचरमुळे वाचला जीव

अ‍ॅपलच्या स्मार्टवॉच आणि आयफोनमुळे आतापर्यंत कित्येक लोकांचा जीव वाचवला आहे. काही दिवसांपूर्वी एक महिला झोपेत असताना तिला हृदयविकाराचा धक्का येण्याची शक्यता होती. अशा वेळी अ‍ॅपल वॉचने इशारा देऊन वेळीच तिला जागं केलं होतं. आता आणखी एका प्रकरणात चक्क दरीत कोसळलेल्या व्यक्तीचा जीव आयफोनने वाचवला आहे.

लॉस अँजेलिसमधून ही घटना समोर आली आहे. स्थानिक माध्यमांनी दिलेल्या माहितीनुसार, माउंट विल्सन क्षेत्रात प्रवास करत असणाऱ्या एका व्यक्तीची कार अचानक 400 फूट खोल दरीमध्ये कोसळली. दरीत कोसळल्यानंतर देखील हा व्यक्ती जिवंत होता. मात्र, त्याठिकाणी मोबाईल नेटवर्क उपलब्ध नव्हतं. अशात आयफोनच्या फीचरमुळे त्याचा जीव वाचला आहे.

काय आहेत फीचर्स?

अ‍ॅपलच्या iPhone 14 मध्ये क्रॅश डिटेक्शन हे फीचर इनबिल्ट मिळतं. यासोबतच, ज्या यूजर्सनी आपली ऑपरेटिंग सिस्टीम iOS 16.1 पर्यंत अपडेट केली आहे त्यांना इमर्जन्सी एसओएस हे फीचरदेखील इन्स्टॉल करता येतं. अपघातावेळी हे दोन्ही फीचर्स यूजर्सच्या भरपूर कामी येतात.

असा वाचला जीव

या व्यक्तीच्या आयफोनमध्ये हे दोन्ही फीचर्स उपलब्ध होते. या व्यक्तीची कार दरीत कोसळत असताना आयफोनचं क्रॅश डिटेक्शन फीचर अ‍ॅक्टिव्हेट झालं. यानंतर इमर्जन्सी SOS फीचरमुळे सॅटेलाईटच्या मदतीने नजीकच्या इमर्जन्सी टीमला यूजरची लोकेशन आणि अपघाताची माहिती पाठवण्यात आली.

या अपघातामध्ये ही व्यक्ती गंभीर जखमी झाली होती. बचाव पथक जेव्हा अपघाताच्या ठिकाणी पोहोचलं, तेव्हा ही व्यक्ती बेशुद्ध होती. केवळ आयफोनने पाठवलेल्या लोकेशनच्या मदतीने, भरपूर प्रयत्न करून बचाव पथक या व्यक्तीपर्यंत पोहोचलं होतं. यानंतर त्याला तातडीने रुग्णालयात हलवण्यात आलं.