Mobile Charging : मोबाईल चार्ज करताना एकच चूक भोवली, गर्भवती तरुणीचा दुर्दैवी मृत्यू! पोटातील बाळही दगावलं

Accident News : स्मार्टफोनचा स्फोट होऊन झालेल्या कित्येक दुर्घटना आपण पाहिल्या आहेत. मात्र आता ब्राझीलमधून एक दुर्दैवी आणि तितकीच भयावह घटना समोर आली आहे. आपला मोबाईल चार्ज करताना वीजेचा धक्का बसून एका गर्भवती तरुणीचा मृत्यू झाला आहे.

स्थानिक माध्यमांनी दिलेल्या माहितीनुसार, जेनिफर कॅरॉलाईन असं या तरुणीचं नाव होतं. ती नुकतीच बाथरुममधून अंघोळ करुन बाहेर आली होती, आणि ओल्या हातांनीच आपला फोन चार्जिंगला लावत होती. एक्स्टेंशन कॉर्डने फोन चार्जिंगला लावताना, अचानक त्यात करंट आला आणि जेनिफरला वीजेचा धक्का बसला.

वीजेचा धक्का बसल्यानंतर जेनिफर मोठ्याने ओरडली. तिचा आवाज ऐकून तिचा पती धावत आतमध्ये आला. जेनिपर यावेळी जमीनीवर पडून होती. तिच्या पतीने तातडीने वैद्यकीय मदत मागवली. मात्र, जेनिफरचा मृत्यू झाल्याचं वैद्यकीय कर्मचाऱ्यांनी स्पष्ट केलं.

बाळही दगावलं

ही दुर्घटना घडली तेव्हा जेनिफर नऊ महिन्यांची गर्भवती होती. जेनिफर सोबतच तिच्या बाळाचाही मृत्यू झाल्याचं डॉक्टरांनी स्पष्ट केलं. यामुळे तिच्या पतीवर दुःखाचा डोंगर कोसळला आहे.

खबरदारी गरजेची

स्मार्टफोन ही आज एक अगदी गरजेची वस्तू झाली आहे. मात्र, याचा वापर करताना योग्य खबरदारी घेणं गरजेचं आहे. मोबाईल किंवा कोणतंही इलेक्ट्रॉनिक गॅजेट हे ओल्या हाताने हाताळू नयेत. तसेच, फोनला चार्जिंगला लावताना देखील विशेष काळजी घ्यावी.(Latest Marathi News)