ISRO Moon Mission : चांद्रयान-३ च्या माध्यमातून इतिहास रचण्यासाठी भारत सज्ज झाला आहे. ही मोहीम यशस्वी झाल्यास चंद्राच्या दक्षिण भागात उतरणारा भारत पहिला देश ठरणार आहे. मात्र, आता हा विक्रम रशियाच्या नावे होण्याची शक्यता निर्माण झाली आहे.
१४ जुलै रोजी इस्रोने 'चांद्रयान-३'चं यशस्वी प्रक्षेपण केलं होतं. सध्या हे चांद्रयान चंद्राच्या कक्षेत पोहोचलं आहे. सर्व काही सुरळीत पार पडल्यास २३ ऑगस्ट रोजी चंद्रावर सॉफ्ट लँडिंग करण्याची इस्रोची योजना आहे. दरम्यान, रशिया देखील आपलं लूना-२५ हे यान चंद्रावर पाठवत असून; ते चांद्रयानाच्या आधी चंद्रावर उतरू शकतं. (Chandrayaan 3 Update)
रशियाची अंतराळ संस्था रोस्कोस्मोस आपलं लूना-२५ हे यान चंद्रावर पाठणार आहे. ११ ऑगस्टला या यानाचं प्रक्षेपण असणार आहे. त्यानंतर पाच दिवसांत ते चंद्राच्या जवळ पोहोचेल. यानंतर पुढचा सुमारे एक आठवडा ते चंद्राच्या कक्षेत फिरेल. त्यानंतर ते चंद्राच्या दक्षिण भागात लँड करेल. यामुळे चांद्रयान-३ आणि लूना-२५ या दोन्ही यानांची लँडिंगची तारीख जवळपास सारखीच असू शकते. (Russia Luna 25)
इस्रोची चांद्रयान-३ मोहीम आणि रशियाची चांद्रमोहीम या दोन्ही वेगळ्या आहेत. भारताचं चांद्रयान हे दोन आठवडे चंद्रावर प्रयोग करण्यासाठी डिझाईन केलं आहे. तर, लूना-२५ हे वर्षभर चंद्रावर असेल. चंद्रावरील पाण्याचं अस्तित्व तपासण्यासाठी लूना चंद्राच्या पृष्ठभागाचे ६ इंच खोलपर्यंत नमूने गोळा करेल. ही मोहीम २०२१ साली राबवण्यात येणार होती, मात्र काही कारणांमुळे ही मोहीम लांबली होती. (Roscosmos Moon Mission)
जवळपास एकाच दिवशी लँडिंग होणार असल्यामुळे दोन्ही यानांची टक्कर होण्याची भीती व्यक्त करण्यात येत आहे. मात्र, असं काही होणार नसल्याचं रोस्कोस्मोसने म्हटलं आहे. चंद्राच्या दक्षिण भागात भरपूर जागा आहे. तसंच दोन्ही यानांची लँडिंगची जागा वेगवेगळी आहे. त्यामुळे दोघांची टक्कर होण्याची भीती आजिबात नाही, असं रशियाच्या अंतराळ संस्थेने स्पष्ट केलं.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
