'iPhone 15' लाँचसाठी सज्ज, तर 'iPhone 13' झाला स्वस्त! फ्लिपकार्ट-अमेझॉनवर किती आहे किंमत?

अ‍ॅपलचा नवीन आयफोन हा काही दिवसांमध्येच लाँच होणार आहे. 12 सप्टेंबर रोजी अ‍ॅपलच्या इव्हेंटमध्ये इतर काही उत्पादनांसोबत iPhone 15 सीरीज देखील लाँच होणार आहे. यामुळे आयफोनच्या जुन्या मॉडेल्सची किंमत कमी झाली आहे.

अ‍ॅपलचा नवीन आयफोन लाँच झाल्यानंतर जुन्या मॉडेल्सची किंमत कमी होण्याचा प्रकार दरवर्षीच दिसून येतो. सध्या iPhone 13 या मॉडेलची किंमत कमी झाली आहे. फ्लिपकार्ट आणि अमेझॉनवर हा आयफोन 58,999 रुपयांना उपलब्ध आहे. तर फ्लिपकार्टवर हा फोन घेतल्यास 2000 रुपयांचा HDFC बँक कार्ड डिस्काउंटही मिळत आहे.

किती आहे खरी किंमत?

iPhone 13 ची किंमत खरंतर 69,990 रुपये आहे. मात्र, सध्या नवीन आयफोन येणार असल्यामुळे या फोनवर सुमारे 10 हजारांचा फ्लॅट डिस्काउंट मिळत आहे. फ्लिपकार्टवर यासोबतच एक्सचेंज ऑफरही मिळत आहे. तुमचा जुना फोन चांगल्या स्थितीत असेल, तर आणखी कमी किंमतीत तुम्ही नवा आयफोन 13 घेऊ शकता.

कोणता फोन घेणं उत्तम?

तुम्हाला चांगले फीचर्स असणारा आयफोन स्वस्तात हवा असेल, तर तुम्ही नक्कीच आयफोन 13 हा पर्याय निवडू शकता. मात्र, तुमचं बजेट जास्त असेल; तर आयफोन 15 साठी थांबणं अधिक योग्य ठरेल. iPhone 15 मध्ये कित्येक तगडे फीचर्स देण्यात येण्याची शक्यता आहे. याव्यतिरिक्त तुम्ही नवा आयफोन लाँच होण्याची वाटही पाहू शकता, त्या नंतर कदाचित iPhone 14 किंवा 12 च्या किंमतीही खाली घसरू शकतात.