Japan Moon Mission : जपानला चंद्रावर पोहोचण्यासाठी लागणार सहा महिन्यांचा वेळ; काय आहे कारण?

भारताने काही दिवसांपूर्वीच चांद्रयान-3 मोहीम यशस्वी केली होती. यानंतर आता जपानने देखील चंद्राच्या दिशेने आपलं लँडर पाठवलं आहे. आज (7 सप्टेंबर) पहाटेच जपानने आपलं रॉकेट लाँच केलं. यामधून एक लँडर आणि एक एक्स-रे इमेजिंग टेलिस्कोप चंद्रावर पाठवण्यात येत आहे.

जपानी अंतराळ संस्था JAXA ने आज या मोहिमेचं यशस्वी प्रक्षेपण केलं. तांगेशिमा स्पेस सेंटरच्या योशीनोबू लाँच कॉम्प्लेक्समधून H-2A हे रॉकेट लाँच करण्यात आलं. या माध्यमातून जपान चंद्राचा आणखी अभ्यास करणार आहे. सोबतच ते चंद्रावर सॉफ्ट लँडिंगचा प्रयत्न देखील करणार आहे.

जपान चंद्रावर लँड करण्यासाठी SLIM हे लँडर पाठवत आहे. हे लँडर नावाप्रमाणेच छोटंसं आहे. याला चंद्रावर उतरवण्यासाठी देखील अगदी कमी जागेची निवड करण्यात आली आहे. चंद्रावर अवघ्या 100 मीटर जागेत हे लँड होईल. यामुळेच या मिशनला 'मून स्नायपर' असंही म्हटलं जात आहे.

सहा महिने करणार प्रवास

हे लँडर चंद्रावर पोहोचण्यासाठी तब्बल सहा महिन्यांचा कालावधी लागणार आहे. जपानी अंतराळ संस्थेचे अध्यक्ष हिरोशी यामाकावा यांनी याचं कारण स्पष्ट केलं. जास्तीत जास्त इंधनाची बचत करण्यासाठी जपान अगदी आरामात हे लँडर चंद्रावर पाठवत आहे.

याचं दुसरं कारण म्हणजे, SLIM हे अगदी छोटं लँडर असल्यामुळे यात कमी प्रमाणात इंधन नेता येऊ शकतं. त्यामुळेही जपान पृथ्वीच्या आणि चंद्राच्या गुरुत्वाकर्षण बलाचा अधिक वापर करून, अगदी हळू-हळू हे यान चंद्रावर नेणार आहे. साधारणपणे फेब्रुवारीमध्ये हे लँडर चंद्रावर उतरेल. ही मोहीम यशस्वी झाल्यास चंद्रावर उतरणारा जपान पाचवा देश ठरणार आहे.

इस्रोने दिल्या शुभेच्छा

जपानने आज या लँडर आणि टेलिस्कोपचे प्रक्षेपण केल्यानंतर, भारताची अवकाश संशोधन संस्था इस्रोनेही जपानचं अभिनंदन केलं आहे. 'SLIM लँडरच्या यशस्वी प्रक्षेपणासाठी JAXAचे अभिनंदन. ग्लोबल स्पेस कम्युनिटीच्या या आणखी एका चांद्र मोहिमेच्या यशासाठी खूप शुभेच्छा' असं इस्रोने आपल्या एक्स (ट्विटर) पोस्टमध्ये म्हटलं आहे.