Solar Eclipse effect : यावर्षीचं पहिलं सूर्यग्रहण आज, म्हणजेच आठ एप्रिल रोजी पार पडेल. गुढीपाडव्याच्या एक दिवस आधी होणाऱ्या या सूर्यग्रहणाचा प्रभाव संपूर्ण जगावर पडेल. हे सूर्यग्रहण भारतातून दिसणार नाही. कॅनडा, अमेरिका आणि दक्षिण अमेरिकेतील काही देशांमधून हे पूर्ण सूर्यग्रहण पाहता येईल. युरोपातील काही देशांमध्ये आंशिक सूर्यग्रहण दिसेल.
तब्बल 54 वर्षांनंतर पहिल्यांदाच एवढ्या मोठ्या वेळेसाठी पूर्ण सूर्यग्रहण (Total Solar Eclipse) होणार आहे. यावेळी सुमारे सात मिनिटांसाठी पूर्णपणे अंधार होईल. भारतीय वेळेनुसार रात्री 9 वाजून 12 मिनिटांनी हे ग्रहण लागेल. भारतात हे ग्रहण दिसणार नसलं, तरी अंतराळात असणारी भारताची प्रयोगशाळा 'आदित्य एल-1' वर याचा काय परिणाम होईल? जाणून घेऊया.
भारताची अंतराळ संशोधन संस्था इस्रोने गेल्या वर्षी 'आदित्य' (Aditya L1) हा उपग्रह लाँच केला होतं. सूर्याचा अभ्यास करण्यासाठी पाठवण्यात आलेला हे भारताचं पहिलाच उपग्रह आहे. सुमारे चार महिन्यांचा प्रवास करून हा उपग्रह एल-1 या लॅग्रेंज पॉइंटवर पोहोचला होता. तिथून तो सातत्याने सूर्याचं निरीक्षण आणि अभ्यास करत आहे.
सूर्यग्रहण (Solar Eclipse) तेव्हा होतं, जेव्हा पृथ्वी आणि सूर्याच्या मध्ये चंद्र येतो. आदित्य हा उपग्रह अशा ठिकाणी ठेवण्यात आला आहे, जिथून त्याच्या आणि सूर्याच्या मध्ये कोणताही दुसरा उपग्रह किंवा ग्रह येणार नाही. सूर्याचा अविरत अभ्यास करता यावा यासाठीच आदित्यला याठिकाणी ठेवण्यात आलं आहे. त्यामुळे हे सूर्यग्रहण आदित्यला दिसणार नाही. तसंच, आदित्य उपग्रहावर या सूर्यग्रहणाचा काही परिणाम होणार नाही.
दरम्यान, अमेरिकेची अंतराळ संशोधन संस्था 'नासा' (NASA) या सूर्यग्रहणाचा अभ्यास करण्यासाठी पूर्णपणे सज्ज झाली आहे. केवळ नासाच नाही, तर अमेरिकेतील कित्येक रिसर्चर्स आणि हौशी लोक सूर्यग्रहण पाहण्यासाठी आणि त्याचा अभ्यास करण्यासाठी सज्ज झाले आहेत. कित्येक ठिकाणी लोक एकत्र येऊन हे सूर्यग्रहण पाहतील. तर नासाचं एक विशेष जेट विमान या सूर्यग्रहणाच्या सावलीचा पाठलाग देखील करणार आहे. (NASA Jet Tracking Eclipse)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
