Jimny Vs. Thar : कोणती लाईफस्टाईल एसयूव्ही आहे तुमच्यासाठी योग्य? फीचर्स वाचा अन् निर्णय घ्या

देशातील सर्वात मोठी गाडी बनवणारी कंपनी असलेली मारुती लवकरच आपली नवीन कार 'जिम्नी' लाँच करणार आहे. लाईफस्टाईल एसयूव्ही या प्रकारात मोडणारी ही कार, महिंद्राच्या थारला चांगलीच टक्कर देणार आहे. त्यामुळे थार घ्यावी की जिम्नी याबाबत बऱ्याच लोकांच्या मनात संभ्रम आहे.

तुमच्याही मनात याबाबत कन्फ्यूजन असेल, तर ही बातमी तुमच्यासाठी महत्त्वाची आहे. नुकतेच जिम्नीच्या मायलेजबाबत कंपनीने माहिती जाहीर केली आहे. यामुळे आता दोन्ही गाड्यांमध्ये तुलना करणे शक्य होत आहे. तेव्हा जिम्नीची प्रतीक्षा करायची, की थार घेऊन टाकायची याचा निर्णय घेणं सोपं जाणार आहे.

मायलेजमध्ये कोण बेस्ट?

मारुतीच्या जिम्नी या एसयूव्हीचं ऑटोमॅटिक व्हेरियंट हे १६.३९ किलोमीटर प्रति लिटर एवढं मायलेज देतं. तर, मॅन्युअल व्हेरियंट हे १६.९४ किलोमीटर प्रति लिटर एवढं मायलेज देतं. दुसरीकडे महिंद्रा थारच्या बाबतीत बोलायचं झाल्यास, या कारचं पेट्रोल व्हेरियंट १५.२ किलोमीटर प्रति लिटर एवढं मायलेज देतं.

थारचं इंजिन दमदार

थारचं मायलेज कमी असण्याचं कारण म्हणजे तिचं दमदार इंजिन. थारमद्ये २.० लीटर टर्बो पेट्रोल इंजिन मिळतं. यात ६-स्पीड मॅन्युअल किंवा ऑटोमॅटिक गिअरबॉक्स देण्यात आला आहे. हे इंजिन १५० एचपी क्षमतेची पॉवर आणि ३०० एनएमचा पीक टॉर्क जनरेट करू शकतं.

दुसरीकडे, जिम्नीमध्ये १.५ लीटर नॅचुरली अ‍ॅस्पिरेटेड के15बी सीरीजचं पेट्रोल इंजिन देण्यात आलं आहे. यामध्ये ५-स्पीड मॅन्युअल किंवा ४-स्पीड ऑटोमॅटिक गिअरबॉक्स मिळतो. हे इंजिन १०३ बीएचपी पॉवर आणि १३४ एनएमचा पीक टॉर्क जनरेट करते.

किंमत ठरू शकते गेमचेंजर

या दोन्ही कारमध्ये कोणती घ्यावी हे ठरवण्यासाठी प्राईज फॅक्टर भरपूर महत्त्वाचा ठरू शकतो. सध्या थारची किंमत १३ ते १६ लाखांमध्ये जाते. तर, तज्ज्ञांनी दिलेल्या माहितीनुसार जिम्नीची किंमत दहा ते बारा लाखांपासून सुरू होऊ शकते.

त्यामुळे स्वस्त आणि चांगले मायलेज देणारी कार हवी असणारे व्यक्ती जिम्नी घेण्याचा विचार करू शकतात. तर, ज्यांना परफॉर्मन्स आणि पॉवर महत्त्वाची वाटते, ते थारचा विचार करू शकतील. शिवाय या दोन्ही कारचे लुक्स पाहून देखील याबाबत निर्णय घेतला जाऊ शकतो. जूनच्या पहिल्या आठवड्यात जिम्नी लाँच होऊ शकते.