M.Tech in Electric Vehicle : इलेक्ट्रिक व्हेईकल तंत्रज्ञानात पहिल्यांदाच एम. टेक.

सोलापूर : अभियांत्रिकी शिक्षणात सोलापूरने ईव्ही (इलेक्ट्रिक व्हेईकल) क्षेत्रात एम. टेक. (ईव्ही) हा पदव्युत्तर पदवीचा अभ्यासक्रम पहिल्यांदाच सुरू होत आहे. आगामी काळातील ई-व्हेईकल तंत्राचा विकास व वाढ लक्षात घेत ही शैक्षणीक संधी उपलब्ध करण्यात आली आहे. नागेश करजगी ऑर्किड अभियांत्रिकी महाविद्यालयात हा अभ्यासक्रम उपलब्ध करण्यात आला आहे.

इलेक्ट्रिक वाहन उद्योगातील कुशल व्यावसायिकांची मागणी मोठ्या प्रमाणात वाढत आहे. सातत्याने इलेक्ट्रीक वाहने बाजारात दाखल झाली आहेत. या शिवाय एसटीने देखील इलेक्ट्रिक बस बाजारात आणल्या आहेत. प्रिसिजन उद्योग समुहाने देखील या तंत्रज्ञानाच्या उत्पादनासाठी पाऊले उचलली आहेत. या कोर्समध्ये सहा विद्यार्थ्यांची प्रवेश क्षमता असेल. मेकॅनिकल, इलेक्ट्रिकल व इलेक्ट्रॉनिक्स संलग्नित अभियांत्रिकी पदवीधारकांना त्यासाठी प्रवेश घेता येतो.

ई-वाहन तंत्रज्ञानाचे महत्त्व

• कार्बन उत्सर्जन कमी करणे

• हवामानातील कार्बन उत्सर्जनाचे परिणाम कमी करणे

• शाश्वत वाहतुकीकडे जागतिक बदलाची दिशा

• पर्यावरणीय प्रभाव

• ऊर्जा कार्यक्षमता

• आर्थिक वाढ

• तांत्रिक नवोपक्रम

• ऊर्जा स्वातंत्र्य

अभ्यासक्रमाची रचना

विद्यार्थ्यांना इलेक्ट्रिक वाहनांच्या क्षेत्रातील सर्वसमावेशक ज्ञान आणि व्यावहारिक कौशल्यांसह सुसज्ज करणे आहे. इलेक्ट्रिक पॉवरट्रेन डिझाइन, बॅटरी टेक्नॉलॉजी, चार्जिंग इन्फ्रास्ट्रक्चर, व्हेईकल डायनॅमिक्स आणि शाश्वत ऊर्जा उपाय यासारख्या आवश्यक बाबींचा अंतर्भाव करण्यासाठी हा अभ्यासक्रम बारकाईने तयार करण्यात आला आहे. विद्यार्थ्यांना हँड्स-ऑन प्रशिक्षण, अत्याधुनिक प्रयोगशाळा आणि उद्योग सहकार्याचा फायदा होईल, हे सुनिश्चित करून ते विकसित होत असलेल्या ऑटोमोटिव्ह क्षेत्रामध्ये योगदान देण्यासाठी तयार करण्यात आलेला आहे.

इलेक्ट्रिक व्हेईकल देखभाल व दुरुस्तीच्या क्षेत्रात सध्या मनुष्यबळाचा मोठा अभाव आहे. पण हे क्षेत्र सातत्याने विकसित होत आहे. याचा विचार करून हा अभ्यासक्रम उपलब्ध करण्यात आला आहे.

- प्रो. एस. एस. काळे, विभागप्रमुख, नागेश करजगी ऑर्किड कॉलेज ऑफ इंजिनिअरिंग, सोलापूर