Needly SOS App : महिला- बाल सुरक्षिततेसाठी अत्याधुनिक 'Needly SOS' मोबाईल ॲप; असे आहेत फीचर

Needly SOS Mobile App : अहमदनगर जिल्हाधिकाऱ्यांच्या वाढदिवसाचे औचित्य साधत महिला व बाल सुरक्षेसाठी तयार करण्यात आलेल्या ''निडली एसओएस'' या मोबाईल ॲपचा प्रारंभ जिल्हाधिकारी सिद्धाराम सालीमठ यांच्या हस्ते करण्यात आला. जिल्ह्यातील महिला व मुलींच्या सुरक्षिततेसाठी अत्याधुनिक अशा ॲपचा चांगला वापर होणार आहे.

जिल्हाधिकारी कार्यालयात ॲप प्रारंभ प्रसंगी उपजिल्हाधिकारी अतुल चोरमारे, गौरी सावंत, सायली सोळंके, साई टेक्नो सर्व्हिसेसचे अजित रोकडे, तुषार वानखेडे, स्मिता तळेकर आदी उपस्थित होते.

महिला व बाल सुरक्षेच्यादृष्टीने अत्यंत उपयुक्त असलेल्या अत्याधुनिक असे ''निडली एसओएस'' हे मोबाईल ॲप्लिकेशन अहमदनगरच्या श्री साई टेक्नो सर्व्हिसेस आणि पुणे येथील अभिनव आय.टी सोल्युशन्स यांनी तयार केले आहे.

अत्यंत कमी शुल्कामध्ये महिला व बालकांच्या सुरक्षेसाठी अनेक सुविधा या ॲपच्या माध्यमातून उपलब्ध करुन देण्यात आल्या आहेत. ''निडली एसओएस'' हे ॲप मोबाईलमध्ये इन्स्टॉल केल्यास संकटकाळी महिलांना जवळच्या चार आप्तेष्टांना त्यांच्या मोबाईलवर संदेश व त्यांचे लोकेशन पाठविण्याची सुविधा देण्यात आली आहे.

ॲपमध्ये देण्यात आलेल्या सायरन बटन दाबल्यास मोठा सायरन सुरू होतो. आप्तेष्टांना संकटग्रस्त महिलेपर्यंत पोहोचता येते. ॲपमध्ये राज्यातील पोलिस ठाण्याचे संपर्क क्रमांक देण्यात आले आहेत. याचा उपयोग पोलिसांशी संपर्क साधण्यासाठी करता येऊ शकतो. यासह इतरही सुविधा या ॲपमध्ये देण्यात आल्या आहेत.