Samsung Beats Apple : जगातील सर्वात मोठा स्मार्टफोन ब्रँड म्हणून अ‍ॅपलची असणारी ओळख सॅमसंगने पुसून काढली आहे. इंटरनॅशनल डेटा कॉर्परेशन (IDC) ने दिलेल्या एका रिपोर्टनुसार, 2024 च्या पहिल्या तिमाहीत सॅमसंगने सर्वाधिक स्मार्टफोनची विक्री केली.
जानेवारी ते मार्च या तिमाहीमध्ये सॅमसंगने एकूण 60.1 मिलियन युनिट्सची विक्री केली. या कालावधीमधील कंपनीचा एकूण मार्केट शेअर 20.8 टक्के राहिला. या तिमाहीमध्ये अ‍ॅपलने 50.1 मिलियन युनिट्सची विक्री केली, आणि त्यांचा मार्केट शेअर 17.3 टक्के राहिला. यानंतर 14.1 टक्के मार्केट शेअरसह श्याओमीने तिसरा क्रमांक पटकावला. तीन महिन्यांमध्ये श्याओमीने सुमारे 40 मिलियन युनिट्सची विक्री नोंदवली आहे.
IDC ने दिलेल्या माहितीनुसार, अ‍ॅपलच्या मागणीमध्ये घट झाल्यामुळे सॅमसंग पुन्हा पहिल्या स्थानी गेलं आहे. अ‍ॅपलने गेल्या वर्षीच्या पहिल्या तिमाहीमध्ये 55.4 मिलियन युनिट्स विकले होते. मात्र यावर्षी त्यामध्ये 10 टक्के घट दिसून आली.
IDC ने दिलेल्या रिपोर्टमध्ये म्हटलं आहे, की 2023 च्या पहिल्या तिमाहीच्या तुलनेत यावर्षीच्या स्मार्टफोन विक्रीमध्ये 7.8 टक्के घट दिसून आली आहे. या तिमाहीमध्ये एकूण 289.4 मिलियन स्मार्टफोन युनिट्सची विक्री झाली. तरीही कोरोना कालावधीमधील दोन वर्षांच्या तुलनेत हा आकडा अगदीच चांगला आणि आश्वासक असल्याचं मत IDC ग्रुपचे व्हॉइस प्रेसिडेंट रायन रेईथ यांनी व्यक्त केलं.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
