Twitter Rate Limit : ट्विटरवर आता पोस्ट वाचण्यालाही लिमिट; एका दिवसात किती ट्विट पाहू शकणार? जाणून घ्या

ट्विटर यूजर्सना कंपनीचे नवे मालक इलॉन मस्क यांनी मोठा धक्का दिला आहे. ट्विटरवर आता यूजर्सना एका दिवसात ठराविक पोस्टच पाहता येणार आहेत. डेटा स्क्रॅपिंग आणि सिस्टीम मॅनिप्युलेशन या गोष्टींना लढा देण्यासाठी ही लिमिट लागू केल्याचं मस्क यांनी सांगितलं आहे.

शनिवारी जगभरातील कित्येक ट्विटर यूजर्सना ट्विट करणे, फॉलो करणे किंवा नवीन ट्विट पाहणे अशा कित्येक क्रियाकलपांमध्ये अडचणी येत होत्या. तुम्ही तुमची रेट लिमीट पार केली आहे, अशा आशयाचा संदेश यूजर्सना मिळत होता. (Twitter Rate Limit)

याबाबत इलॉन मस्क यांनी स्पष्टीकरण दिले. की, आता ट्विटर यूजर्सना एका दिवसाला ठराविक पोस्टच दिसणार आहेत. मस्क यांनी एका ट्विटमध्ये असं सांगितलं आहे, की व्हेरिफाईड यूजर्स एका दिवसाला १० हजार ट्विट्स पाहू शकणार आहेत. तर, अनव्हेरिफाईड यूजर्स दिवसाला १ हजार ट्विट्स पाहू शकणार आहेत. नवीन अनव्हेरिफाईड यूजर्स हे दिवसाला ५०० ट्विट्स पाहू शकतील.

शनिवारी कमी होतं लिमिट

शनिवारी इलॉन यांनी असं जाहीर केलं होतं, की ट्विटरचे व्हेरिफाईड अकाउंट असणाऱ्या व्यक्ती एका दिवसात ६,००० पोस्ट पाहू शकणार आहेत. तर, अनव्हेरिफाईड अकाउंट दिवसाला ६०० पोस्ट पाहू शकणार आहेत. अगदी नवीन अनव्हेरिफाईड अकाउंट्स दिवसाला केवळ ३०० पोस्ट पाहू शकणार आहेत.

मात्र, काही वेळानंतर आणखी एका ट्विटमध्ये त्यांनी ही लिमिट अनुक्रमे ८०००, ८०० आणि ४०० अशी होणार असल्याची माहिती दिली होती. त्यानंतर पुन्हा एकदा ही लिमिट वाढवली आहे.

लॉग-इन करणं बंधनकारक

दरम्यान, इलॉन मस्कने शनिवारी आणखी एक मोठी घोषणा केली होती. यानुसार, आता ट्विटर वापरण्यासाठी यूजर्सना लॉग-इन करणं बंधनकारक असणार आहे. लॉग इन केल्याशिवाय ट्विटर ब्राऊज करणं आता शक्य होणार नाही.