टेक्नोहंट : मेलचे मोबाइलवरही करता येणार भाषांतर

- वैभव गाटे

गुगल बार्ड’ सादर केल्यापासून कंपनी वापरकर्त्यांसाठी नवनवे अपडेट देण्यावर भर देत आहे. गुगलने आता ‘जीमेल अ‍ॅप’साठी भाषांतराचे फीचर आणले आहे. यापूर्वी केवळ वेबसाठी असलेले हे फीचर गुगलने मोबाइलसाठीही सादर केल्याने वापरकर्त्यांना आता कुठेही, कधीही मेलचा भाषांतर करणे सहज शक्य होणार आहे. अ‍ॅण्ड्राइड, आयओएस अशा दोन्ही ऑपरेटिंग सिस्टिमसाठी हे फीचर काम करेल.

काय आहे फीचर?

• सर्च इंजिन गुगल तब्बल १०० भाषांमध्ये भाषांतराची सुविधा देते. त्यामुळे जीमेल वेबवर (संगणकासाठी) मेलचे भाषांतर करण्याचे फीचर वापरकर्त्यांना उपलब्ध होत होते. मात्र, हेच फीचर मोबाइल अ‍ॅपसाठी मिळत नव्हते, परंतु नव्या अपडेटमध्ये गुगलने हे फीचर मोबाइलसाठीही रोलआउट केले आहे.

• वापरकर्त्यांना आलेला मेल त्यांनी निवड केलेल्या भाषेत भाषांतरित करता येणार आहे. त्यासाठी आलेल्या मेलच्या वरील बाजूस ‘ट्रान्स्लेट’ हा बॅनर दिसेल. त्यावर क्लिक केल्यावर संपूर्ण मेल निवड केलेल्या भाषेत भाषांतरित होईल.

• उदा. वापरकर्त्याला एखादा मेल इंग्रजीमध्ये आलेला असेल. तर, तो मेल त्याने निवडलेल्या मराठी किंवा हिंदी व अन्य कोणत्याही भाषेत भाषांतरित करता येईल.

• याशिवाय वापरकर्त्यांना हे फीचर बंददेखील करता येईल. तसेच हा पर्याय कस्टमाइजही करता येईल.

कसे वापराल फीचर?

• प्ले स्टोअर किंवा अ‍ॅपल स्टोअरमधून अ‍ॅप अपडेट करा

• अपडेटनंतर आलेल्या इ-मेलच्या वरील बाजूस ‘ट्रान्स्लेट टू ...’ हा पर्याय दिसेल

• ‘ट्रान्स्लेट टू...’ या पर्यायावर क्लिक केल्यावर संपूर्ण इमेल तुम्ही निवडलेल्या भाषेत भाषांतरित होईल.

• यात ऑटो ट्रान्स्लेटचा पर्यायही उपलब्ध आहे.

• हा पर्याय निवडल्यास प्रत्येक मेल निवडलेल्या भाषेत भाषांतरित होईल.

कधी होणार उपलब्ध?

गुगलच्या ब्लॉगनुसार ॲण्ड्राइड वापरकर्त्यांसाठी हे फीचर ८ ऑगस्टपासून तर आयओएस वापरकर्त्यांसाठी २१ ऑगस्टपासून उपलब्ध होण्यास सुरुवात होईल. गुगल स्पेसच्या वापरकर्त्यांसह गुगल अकाउंट असलेल्या प्रत्येकाला हे फीचर उपलब्ध होईल.