Zomato Hiring: झोमॅटो आता चोवीस तास देणार फूड डिलिव्हरी? लवकरच सुरु होणार मोठी भरती

नवी दिल्ली : झोमॅटोनं नुकतीचं आपली तीन टक्के कर्मचारी कपात केली होती. पण आता पुन्हा मोठी भरती सुरु केली आहे. विशेष म्हणजे झोमॅटो आता सात दिवस २४ तास सेवा देणार आहे. कंपनीचे संस्थापक दिपिंदर गोयल यांनी याबाबत नुकतीच माहिती दिली. पण यामुळं आता फूड डिलिव्हरी क्षेत्रातही मोठी स्पर्धा सुरु होत असल्याची चिन्हं आहेत.

झोमॅटोचे संस्थापक दिपिंदर गोयल यांनी नुकतीच लिंक्डइनवर (LinkedIn) एक पोस्ट केली होती. यामध्ये ८०० कर्मचाऱ्यांची भरती करणार असल्याचं त्यांनी म्हटलं आहे. पण यातील अटीशर्टी सर्वांचं लक्ष वेधून घेतात. यामध्ये म्हटलं की, उमेदवारांना त्यांचा 'वर्क-लाईफ बॅलन्स' विसरावा लागेल. (वर्क-लाइफ बॅलन्स म्हणजे एक अशी समतोल स्थिती जिथं एखादी व्यक्ती आपल्या करिअरच्या मागण्या आणि वैयक्तिक जीवनाच्या मागण्यांना समान प्राधान्य देते)

झोमॅटो विविध पाच पोस्टसाठी तब्बल ८०० कर्मचाऱ्यांची भरती करणार आहे. यामध्ये प्रॉडक्ट मॅनेजर, इंजिनिअर्स, ग्रोथ मॅनेजर्स आणि इतर अनेक पदांचा समावेश आहे. पारंपारिक कामाच्या पद्धतींना विसरुन ज्यांना चावीस तास काम करण्यात अडचण नसेल अशा इच्छुक उमेदवारांनी आमच्याशी संपर्क साधावा असं गोयल यांनी आपल्या लिंक्डइन पोस्टमध्ये म्हटलं आहे.

दरम्यान, झोमॅटोनं नोव्हेंबर महिन्यातच कंपनीची ३ टक्के कर्मचारी कपात केली होती. यामध्ये ३,८०० कर्मचाऱ्यांना नारळ देण्यात आला होता. यामुळं विविध डिपार्टमेंटवर त्याचा परिणामही झाला होता.