Kalsubai Peak : महाराष्ट्राचे ‘माऊंट एव्हरेस्ट’ अशी खास ओळख असलेले कळसूबाई शिखर पर्यटकांचे प्रमुख आकर्षण आहे. दरवर्षी देश-विदेशातील असंख्य पर्यटक या ठिकाणी भेट देण्यासाठी येतात. पावसाळ्यात तर येथील नजारा नयनरम्य असा असतो.
नुकतीच या कळसूबाई शिखराला प्रसिद्ध उद्योगपती आनंद महिंद्रा (anand mahindra) यांनी भेट दिली होती, याचा व्हिडिओ देखील त्यांनी सोशल मीडियावरील प्लॅटफॉर्म एक्सवर शेअर केला होता. कळसूबाई शिखराला भेट देण्याचा अनुभव त्यांनी या व्हिडिओतून व्यक्त केला होता.
हा व्हिडिओ शेअर करताना त्यांनी कॅप्शनमध्ये म्हटले होते की, ‘मी अनेकदा इगतपुरीला आलो आहे. परंतु, मला कधीच या ठिकाणाबद्दल, त्याच्या सौंदर्याबद्दल ऐकायला मिळाले नव्हते. आपण सर्वांनीच आयुष्यात एकदा तरी या ठिकाणाला भेट देण्यासाठी वेळ काढायला हवा’ अशा शब्दांमध्ये त्यांनी कळसूबाई शिखराचे अप्रतिम वर्णन केले होते.
आज आपण याच कळसूबाई शिखराबद्दल जाणून घेणार आहोत. यंदाच्या सुट्टीत तुम्ही देखील मुलांसोबत आणि कुटुंबासोबत या ठिकाणी फिरायला जाऊ शकता. या ठिकाणी कसे जायचे? चला तर मग जाणून घेऊयात.
कळसूबाई शिखर महाराष्ट्रातील अहमदनगर जिल्ह्यातील अकोला तालुक्यात स्थित आहे. कळसूबाई हे शिखर महाराष्ट्रातील सर्वात उंच शिखर आहे. महाराष्ट्राचे 'माऊंट एव्हरेस्ट' अशी या ठिकाणाची खास ओळख आहे. समुद्रसपाटीपासून या शिखराची उंची तब्बल ५४०० एवढी आहे. या शिखराच्या टोकावर गेल्यावर तुम्हाला निसर्गाचा अप्रतिम नजारा दिसतो. जर तुम्हाला ट्रेकिंगची आवड असेल तर तुम्ही या ठिकाणाला एकदा नक्की भेट द्या. (Kalsubai Peak)
मुंबईहून कळसूबाई पर्वतावर जाण्यासाठी कसारापर्यंत लोकल ट्रेन धावते. तुम्ही ट्रेन किंवा थेट बसने अहमदनगर किंवा अकोल्यापर्यंत जाऊ शकता. त्यानंतर, तुम्ही जीपच्या मदतीने बारी गावात पोहचू शकता.
या व्यतिरिक्त पॅसेंजर ट्रेनच्या मदतीने तुम्ही इगतपुरीलाही जाऊ शकता. इगतपुरीला गेल्यानंतर, शेअरिंग टॅक्सीच्या मदतीने तुम्ही कळसूबाई शिखरापर्यंत जाऊ शकता. कळसूबाई शिखराच्या पायथ्याशी बारी हे गाव आहे. या गावातूनच कळसूबाई शिखरावर जाण्याचा रस्ता आहे. (How to reach Kalsubai peak?)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
