कास पठारला निघालात? सावधान! रक्तपिपासू जळवांचा प्रचंड सुळसुळाट

कास (सातारा) : जून महिन्यापासून सातत्याने सुरू असलेल्या पावसामुळे कास पठार (Kas Plateau) परिसर, सह्याद्रीनगर ते गाळदेवपर्यंतचा डोंगरमाथ्यावरील पट्टा, दुर्गम कांदाटी खोऱ्यातील (Kandati Valley) डोंगरमाथा अशा संपूर्ण भागात रक्त शोषणाऱ्या जळवांचा प्रचंड सुळसुळाट झाला असून, पाळीव जनावरे आणि माणसांना मोठ्या प्रमाणात लागून यांचा उपद्रव होत आहे. यावर्षी अतिवृष्टीमुळे जळवांचे प्रमाण दुप्पट झाल्याचे जाणकार बोलताना दिसत आहेत.

दरवर्षी जून महिन्याचा पाऊस सुरू झाला की, दलदलीच्या ठिकाणी जळवा आढळतात. ज्या ठिकाणी पालापाचोळा, गवत कुजलेले असते. अशा ठिकाणी यांचा वावर प्रामुख्याने मोठ्या प्रमाणात असतो. मानवी वस्तीपासून दूर असणाऱ्या या जळवा यावर्षी मोठ्या प्रमाणात मानवी वस्तीत आढळताना दिसत आहेत. शिवारात चरावयास गेलेल्या जनावरांच्या माध्यमातून जळवा घरापर्यंत पोचत आहेत. अनेक पर्यटकांना या जळवा लागून रक्तस्त्रावाला सामोरे जावे लागत आहे.

यावर्षी पावसाची रिपरिप सारखीच सुरू असल्याने जळवांची संख्या मोठ्या प्रमाणात वाढली आहे. विषारी जळवांमुळे रक्त पिलेल्या ठिकाणी जखमा होत असून, सातत्याने खाज सुटते. त्यामुळे काळजी घेणे गरजेचे आहे. पाऊस जावून कडक उन पडल्याशिवाय जळवांचा धोका कमी होणार नसून, पावसाला वैतागलेल्या लोकांना या नवीन त्रासाने चांगलेच जेरीस आणले आहे.

जळवांपासून अशी घ्यावी काळजी...

• कास परिसरात फिरताना जळवा लागण्याचा धोका असून, शक्यतो पायावर जास्त चढतात. ज्या ठिकाणी रक्त पिते त्या ठिकाणी खाज सुटते. खाज होत असल्यास त्या ठिकाणी लगेच पाहा, दुर्लक्ष करू नका.

• गवतातून फिरून आल्यावर पाय नीट पाहा. नीट लक्ष दिल्यास जळवा चिकटलेली लक्षात येते.

• पायावर चढल्यास घाबरू नका. कागद वगैरे घेऊन पकडून काढून टाका. रक्त येत असलेल्या ठिकाणी हळद मिळाल्यास लावा.

• कोरोनामुळे प्रत्येकाच्या जवळ सॅनिटायझर असते. जळवावर सॅनिटायझर मारल्यास तत्काळ चिकटलेली जागा सोडून ती मरण पावते.