पर्यटकांसाठी खुशखबर! सह्याद्रीच्या डोंगर रांगेवरून कोसळणारा 'हा' फेमस धबधबा पर्यटनासाठी खुला; पण..

राशिवडे बुद्रुक (कोल्हापूर) : पावसाने उसंत घेतल्याने राऊतवाडीचा धबधबा (Rautwadi Waterfall) पर्यटकांना (Tourists) आजपासून पाहता येणार आहे; मात्र ज्या दिवशी रेड किंवा ऑरेंज अलर्ट असेल तेव्हा धबधब्यावर जायला बंदी असणार आहे.

पावसाळी पर्यटनासाठी अत्यंत सुरक्षित आणि सहकुटुंब पाहता येण्यासारखा धबधबा म्हणून राऊतवाडीला पर्यटकांनी पसंती दिली आहे. अल्पावधीतच मोठ्या प्रमाणात पर्यटक इकडे येऊ लागल्याने स्थानिक नागरिकांनाही यावर आधारित हंगामी छोटे-मोठे उद्योग करता येत आहेत.

राधानगरीच्या धरणाच्या डाव्या बाजूच्या सह्याद्रीच्या डोंगर रांगेवरून कोसळणारा हा जलप्रपात म्हणजे प्रत्येक पावसाळ्याची वर्षा सहल. यंदा पावसाने सुरुवात केल्यानंतर धबधबा प्रवाहित होताच पर्यटकांची रीघ याकडे लागली. जेमतेम आठ दिवसच हा धबधबा पर्यटकांना अनुभवता आला. त्यानंतर मुसळधार पावसाने सुरुवात केली आणि धबधब्याने उग्र रूप धारण केले.

प्रवाह इतका मोठा होता की, कड्या कपाऱ्यातून दगड त्याच्याबरोबर वाहून येत होते आणि जलस्त्रोत वेगाने तलावाकडे धावत होता. अशा परिस्थितीत एखादा पर्यटक प्रवाहात वाहू नये किंवा अघटीत घडू नये या कारणास्तव येथील प्रशासनाने पर्यटकांना बंदी घातली होती. कालपासून संथगतीने राऊतवाडीचा धबधबा कोसळतो आहे. यामुळे पर्यटकांना तो आजपासून खुला केला आहे.

मोठ्या प्रमाणात पाऊस आणि धबधब्याने उग्ररूप धारण केल्यामुळे पर्यटकांना येथे बंदी घालण्यात आली होती. आता पावसाने उसंत घेतल्याने धबधबा पर्यटकांना पाहता येणार आहे; मात्र वाकीच्या तोरस्करवाडीचा धबधबा ३१ ऑगस्टपर्यंत पर्यटकांसाठी बंद राहील.

- अनिता देशमुख, तहसीलदार, राधानगरी