Amboli Ghat : आंबोलीतला 'हा' धबधबा झाला प्रवाहित; घाटात 200 मिलीमीटरपेक्षा जास्त पाऊस, हिरण्यकेशीला मोठ्या प्रमाणात पाणी

आजरा : आंबोली (Amboli) परिसरात झालेल्या पावसामुळे हिरण्यकेशी नदीला (Hiranyakeshi River) पाणी आले आहे. नदी पात्रालगत भरून वहात आहे. यामुळे रामतीर्थ येथे असलेला रामतीर्थ धबधबा (Ramtirth Waterfall) प्रवाहित झाला आहे. पश्चिम भागातील नदीकाठच्या गावातील पिण्याच्या पाण्याची चिंता मिटली आहे.

गेले पंधरा ते वीस दिवस आंबोली परिसरात पावसाळी वातावरण तयार झाले आहे. येथे दररोज वीस ते पंचवीस मिलीमीटर पाऊस पडत आहे. आजरा तालुक्यातही ठिकठिकाणी पाऊस पडत आहे. आंबोली परिसरात दोनशे मिलीमीटरपेक्षा अधिक पाऊस झाल्याने ओढे व नाल्यांना पाणी आले आहे.

हिरण्यकेशी नदीला पाणी आले आहे. आज सकाळी हिरण्यकेशीवरील साळगाव बंधाऱ्यातून पाणी पुढे सरकले आहे. काल दुपारपासून रामतीर्थ धबधबा प्रवाहित झालेला आहे. पावसाचे वातावरण लक्षात घेता शेतकऱ्यांनी नदीकाठावरील वीज पंप काढून घेतले आहेत.

सर्फनाल्यात होणार ६६ टक्के पाणीसाठा

यंदा सर्फनाला प्रकल्पात कोणत्याही परिस्थितीत पाणीपुरवठा करण्याचे नियोजन आखले आहे. या प्रकल्पाच्या घळभरणीचे काम जवळपास पूर्ण झाले आहे. या प्रकल्पात ६६ टक्के पाणीसाठा करण्याचे पाटबंधारेचे नियोजन आहे. त्यामुळे अनेक गावांचा उन्हाळ्यातील पिण्याच्या पाण्याचा प्रश्न मार्गी लागणार आहे.

जिल्ह्यात पावसाची पुन्हा हजेरी

कोल्हापूर : मृग नक्षत्राच्या सुरुवातीला पडलेल्या पावसानंतर आठवड्याभराने पुन्हा एकदा आज हजेरी लावली. शहरात हलक्या सरी कोसळल्या, तर जिल्ह्यात अनेक ठिकाणी जोरदार पाऊस झाला. दिवसभर उष्म्याने हैराण झालेल्या नागरिकांना सायंकाळनंतर पडलेल्या पावसाने दिलासा मिळाला. जिल्ह्यातही धरण क्षेत्रासह अनेक ठिकाणी जोरदार पाऊस झाला.