Travel Diaries : रिव्हर राफ्टिंगचा प्लॅन करताय? मग, भारतातील ‘या’ सर्वोत्तम ठिकाणांना नक्की द्या भेट

Travel Diaries : सध्या देशातील अनेक भागांमध्ये प्रचंड उकाडा निर्माण झाला आहे. काही राज्यांमध्ये तर उष्णतेची लाट निर्माण झाली आहे. या उष्णतेच्या लाटेमुळे काही जणांचा बळी देखील गेला आहे. खर तर उन्हाळ्यात अनेकांना सुट्ट्या लागलेल्या असतात. त्यामुळे, या सुट्टीमध्ये बाहेर फिरायला जाण्याची सगळ्यांची इच्छा असते.

उष्णतेपासून आराम मिळवण्यासाठी आणि कुठेतरी थंड हवेच्या ठिकाणी जाण्यासाठी सगळेजण उत्सुक असतात. रिव्हार राफ्टिंग करायला अनेकांना आवडते आणि रिव्हर राफ्टिंगसाठी उन्हाळा हा सर्वोत्तम काळ मानला जातो. वॉटर स्पोर्ट्सपैकी एक असलेले हे रिव्हर राफ्टिंग हे करायला अतिशय आव्हानात्मक असते. ज्या लोकांना साहस करायला आवडते. त्यांनी आयुष्यात एकदा तरी रिव्हर राफ्टिंगचा आनंद जरूर घ्यावा.

यंदाची सुट्टीत जर तुम्ही रिव्हार राफ्टिंग करायचा विचार करत असाल तर त्यासाठी भारतातील टॉप ठिकाणे कोणती आहेत? ते आज आम्ही तुम्हाला सांगणार आहोत. चला तर मग जाणून घेऊयात ही रिव्हर राफ्टिंगची सर्वोत्तम ठिकाणे

महाराष्ट्रातील कोलाड

कोलाड हे महाराष्ट्रातील एक लोकप्रिय पर्यटनस्थळ आहे. मुंबई आणि पुण्याजवळ स्थित असलेले हे एक प्रमुख पर्यटनस्थळ आहे. महाराष्ट्रातील सुप्रसिद्ध असलेले हे ठिकाण पर्यटकांनी नेहमीच गजबजलेले असते. कुंडलिका नदीवर रिव्हर राफ्टिंगसाठी हे ठिकाण प्रसिद्ध आहे. येथील नैसर्गिक सौंदर्य आणि नदीचे नयनरम्य दृश्य रिव्हर राफ्टिंगची मजा आणखी द्विगुणित करते. महाराष्ट्रातील लोकांना जर रिव्हर राफ्टिंग करायचे असेल तर, त्यांनी या ठिकाणी जरूर जावे.

उत्तराखंडमधील ऋषिकेश

उत्तराखंड राज्यातील एक लोकप्रिय पर्यटनस्थळ म्हणून ऋषिकेशला ओळखले जाते. हे शहर गंगा नदीच्या काठावर वसले आहे. रिव्हर राफ्टिंगची राजधानी म्हणून ही ऋषिकेशला ओळखले जाते. दरवर्षी देश-विदेशातील असंख्य पर्यटक या ठिकाणी भेट देत असतात. रिव्हर राफ्टिंगसोबतच तुम्ही येथील आसपासच्या ठिकाणांना ही भेट देऊ शकतात.

हिमाचल प्रदेशातील कुलू-मनाली

कुलू-मनाली हे हिमाचल प्रदेशातील एक लोकप्रिय ठिकाण आहे. दरवर्षी देश-विदेशातील असंख्य पर्यटक या ठिकाणी भेट देण्यासाठी येतात. येथील उंच बर्फाच्छादित पर्वत, बर्फातील विविध खेळ आणि इतर प्रेक्षणीय ठिकाणांना तुम्ही भेट देऊ शकता. यासोबतच तुम्ही येथून वाहणाऱ्या बियास नदीवर रिव्हर राफ्टिंगचा आनंद घेऊ शकता.

कर्नाटकातील कुर्ग

कर्नाटक राज्यातील कुर्ग हे एक अतिशय सुंदर पर्यटनस्थळ आहे. कुर्ग हे शहर तिथल्या नैसर्गिक सौंदर्यासाठी आणि कॉफीच्या बागांसाठी खास करून ओळखले जाते. येथील बारीपोल नदीवर तुम्ही रिव्हर राफ्टिंगचा आनंद घेऊ शकता.