Viral News : "देव तारी त्याला कोण मारी" बोट बुडूनही 6 तास फ्रिजमध्ये बसून वाचवला जीव

Viral News : "देव तारी त्याला कोण मारी" ही म्हण आपल्यापैकी अनेकांनी ऐकली आहे. या म्हणीचा प्रत्यय एका व्यक्तीबाबत समोर आला आहे. बोट उलटल्यानंतर एक व्यक्ती फ्रिजच्या सहाय्याने तब्बल सहा तास जीव वाचवण्यासाठी झटत होती. सध्या ही बातमी सोशल मीडियावर मोठ्या प्रमाणात व्हायरल होत आहे. व्हायरल होणारी ही घटना दक्षिण थायलंडमधील क्राबी प्रांताच्या किनार्‍यावरील आहे.

मुआंग जिल्ह्यातील नोंग थेले उपजिल्ह्यातील थ्री गावामधील 33 वर्षीय मच्छिमार अनात मासोयट (Anat Massoyot) हे त्यांच्याकडील बोटीमधून हॉंग आयलँडजवळील कोह लाओ हँग बेटावर मासेमारी करण्यासाठी गेले होते. मात्र, २३ ऑक्टोबर रोजी नेहमीप्रमाणे मासेमारीसाठी गेले होते.

त्यावेळी अचानक त्यांची बोट पाण्यात उलटली. त्यावेळी जीव वाचवण्यासाठी अनात यांनी मासे ठेवण्यासाठी बोटीवरील फ्रिजची मदत घेतली. मासे ठेवण्यासाठी वापरण्यात येणारा फ्रिजच एक दिवस आपला जीव वाचवेल असा विचार अनात यांनी स्वप्नातही केला नव्हता. बोट उलटल्यानंतर आपल्याला वाचवण्यासाठी कुणीतरी येईल यासाठी ते फ्रिजवर बसून तब्बल सहा तास वाट बघत राहिले.

सहा तासांच्या प्रदीर्घ प्रतीक्षेनंतर अखेर एक मासेमारी करणाऱ्या बोटीवरील काही नागरिकांनी ही घटना बघितली. त्यावेळी क्षणाचाही विलंब न करता नागरिकांनी धाव घेत अनात यांना मदत करत त्यांना फ्रीजमधून सुखरूप बाहेर काढले.