Dhule News : पीकविमा कंपनीची रक्कम देण्याबाबत हेराफेरी : ॲड. प्रकाश पाटील

Dhule News : धुळे जिल्ह्यातील शेतकरी रब्बी २०२२-२३ मध्ये पीक कापणी प्रयोगावर आधारित नऊ कोटी ७६ ला एवढी नुकसानभरपाईसाठी पात्र होते. विमा कंपनीने जवळपास ७६ लाखांची किरकोळ नुकसानभरपाई वितरित केली. शिंदखेडा तालुक्यातील बेटावद, नरडाणा व वर्षी या महसुली मंडळांत नऊ कोटी देय होते.

त्याबाबतीत कंपनीने मौन बाळगले. विशेष म्हणजे पीक कापणी प्रयोगाच्या आकडेवारीत हेराफेरी केल्याचा आरोप विमातज्ज्ञ तथा कृषिभूषण अॅड. प्रकाश पाटील यांनी केला आहे.

कृषिभूषण अॅड. पाटील यांनी पीकविमा कंपनीच्या हेराफेरीबाबत जिल्हाधिकारी अभिनव गोयल यांना निवेदन दिले. निवेदनात नमूद केले आहे, की पीकविम्याची उंबरठा उत्पादनावर आधारित नुकसानभरपाई दिली जाते.

त्याची आकडेवारी फक्त विमा कंपनीकडे आहे. परिणामी नुकसानभरपाई देय आहे किंवा नाही, हे शेतकऱ्यांना समजत नाही. याचाच फायदा विमा कंपनी घेत आहे, तर कृषी खात्याचे याकडे दुर्लक्ष आहे.

याबाबतीत कंपनीच्या वरिष्ठ अधिकाऱ्यांशी संपर्क साधला. त्यांनी भ्रमणध्वनी न उचलणे, वेगळीच माहिती देणे, टाळाटाळ करणे आदींवरून हेराफरीचा संशय वाढलाय. चौकशीतून विमा कंपनीने कृषी विभागाकडून माहिती मागविली.

विभागानेसुद्धा जुनीच माहिती पाठविली. कंपनीने कृषी विभागाशी कोणताही संपर्क साधला नाही. जिल्हा अधीक्षक कृषी अधिकारी कार्यालयाला आजही काहीच माहिती नाही. याबाबत सखोल चौकशीची मागणी केली आहे.

पात्र शेतकऱ्यांना नुकसानभरपाई द्यावी

जिल्हा पीकविमा तक्रार निवारण समितीची बैठक बोलावावी. पीक कापणीची तालुकास्तरीय, जिल्हास्तरीय व विमा कंपनी पातळीवरील आकडेवारी मागवून प्रत्यक्ष पाहणी करावी. बैठकीसाठी जबाबदार विमा कंपनी प्रतिनिधीला बोलवून सोक्षमोक्ष लावावा.

पात्र शेतकऱ्यांना नुकसानभरपाई मिळवून द्यावी. नुकसानभरपाई मार्गदर्शक सूचनेनुसार १२ टक्के व्याजदराने द्यावी, अशी मागणी अॅड. पाटील, जिल्हा परिषद सदस्य ललित वारुडे व कृषिभूषण वाल्मीक पाटील यांनी केली आहे.