Dhule Agriculture News : भुईमूग शेंगा काढणीसाठी शेतकऱ्यांची लगबग; अपेक्षित भावाअभावी शेतकऱ्यांमध्ये नाराजी

Dhule Agriculture News : गेल्या चार-पाच दिवसांपासून पावसाचे वातावरण निर्माण होत आहे. जोरदार सुसाट वादळी वारा वाहत असून, रब्बी हंगामातील पीक काढणीसाठी शेतकऱ्यांची तारांबळ उडत आहे. सध्या भुईमूग शेंगा काढणीसाठी शेतकऱ्यांची लगबग सुरू झाली आहे. दरम्यान, कृषी उत्पन्न बाजार समितीत ढगाळ वातावरणामुळे शेतकऱ्यांना अपेक्षित भाव मिळत नसल्याने नाराजी व्यक्त केली जात आहे. कृषी उत्पन्न बाजार समितीत तीनशे क्विंटलपेक्षा जास्त आवक झाली आहे. (Agriculture Farmers rush to harvest groundnut pods )

त्यामुळे भावही घसरले आहेत. ओल्या-कोरड्या भुईमूग शेंगांना पाच हजार २०० ते पाच हजार ७०० रुपयांपर्यंत भाव दिला जात आहे. कोरड्या शेंगांना सहा हजारांपासून ते सहा हजार ६०० रुपये भाव दिला जात आहे; परंतु खते, बी-बियाणे, मजुरी वाढल्याने भुईमूग शेंगांना मिळणारा भाव परवडत नसल्याची खंत शेतकऱ्यांकडून व्यक्त केली जात आहे.(latest marathi news)

ओली-कोरडीसाठी सात हजार रुपये, तर कोरड्या शेंगांना दहा हजार रुपये भाव दिला जावा, अशी मागणी शेतकऱ्यांकडून केली जात आहे. कृषी उत्पन्न बाजार समितीत सध्या ३०० ते ४०० क्विंटल रोजची आवक झाली आहे. प्रामुख्याने तापी नदीकाठावरील शेतीतील व शिरपूर तालुक्यातील शेतकऱ्यांचा माल कृषी उत्पन्न बाजार समितीत विक्रीसाठी येत आहे.

शिंदखेडा तालुका दुष्काळी असल्याने अपेक्षित भाव शेतमालाला मिळत नाही. खर्चही निघणार नाही. चार-पाच दिवसांपासून ढगाळ वातावरण निर्माण झाले आहे. त्यामुळे क्विंटलमागे दोन-तीनशे रुपये भाव कमी झाला आहे. खरीप हंगामाची तयारी करण्यासाठी मेअखेर रब्बी पीक काढणीसाठी शेतकऱ्यांची लगबग सुरू झाली आहे.