Dhule Crime: दरोडेखोरांची टोळी मुद्देमालासह अटकेत; धुळे तालुका पोलिस ठाण्याची काही तासांत कामगिरी

Dhule Crime : फायनान्स कंपनीच्या वसुली व्यवस्थापकाला लुटणाऱ्या दरोडेखोरांच्या टोळीला काही तासांत धुळे तालुका पोलिस ठाण्याने मुद्देमालासह गजाआड केले. या दरोडेखोरांकडून लुटीतील सर्व रोकड हस्तगत करण्यात आली. (Gang of robbers arrested with loot)

अर्थे (ता. शिरपूर) येथील चेतनसिंग मोहनसिंग परदेशी (वय २२) हे भारत फायनान्स कंपनीत कलेक्शन मॅनेजर आहेत. आर्वी, धाडरे (ता. धुळे) येथील बचत गटाच्या सदस्यांना वाटप केलेल्या कर्जाच्या हप्त्याची वसुलीची रक्कम घेत बोरकुंड येथील त्यांचे सहकारी प्रकाश कोळी यांना वसुलीत परदेशी यांनी मदत केली. पावसामुळे रात्री उशिराने म्हणजेच साडेअकराला ते त्यांच्या दुचाकीने धुळ्याकडे निघाले.

बोरकुंडकडून धुळ्याकडे येत असताना रात्री ११.४० ला दोंदवड फाट्याजवळ त्यांची दुचाकी पाच ते सात जणांनी थांबविली. त्यांच्या पोटाला चाकू लावत कर्जवसुलीची ७८ हजारांची रोकड, कार्यालयीन कामकाजाचे ५० हजार किमतीचे दोन टॅब, पंधरा हजार किमतीचे तीन बायोमेट्रिक मशिन हिसकावून दरोडेखोर दुचाकीद्वारे पळाले. ही घटना बुधवारी (ता. २५) घडली. (latest marathi news)

या प्रकरणी परदेशी यांनी तालुका पोलिसांकडे फिर्याद दिली. या गुन्ह्यात तालुक्याचे पोलिस निरीक्षक अभिषेक पाटील यांनी तपास चक्रे फिरविली. त्यांच्यासह पोलिस पथकाने दिनेश महादू रामोशी (वय ३३), रवींद्र मोहन भिल (वय २०), राजेंद्र शांताराम भिल (वय २२), नारायण श्रीराम भिल (वय २५), कैलास ताराचंद भिल (वय ३०, सर्व रा. रतनपुरा) यांना ताब्यात घेतले.

त्यांनी गुन्ह्याची कबुली दिली. त्यांच्याकडून रोकडसह मुद्देमाल हस्तगत करण्यात आला. पोलिस अधीक्षक श्रीकांत धिवरे, अपर पोलिस अधीक्षक किशोर काळे, उपअधीक्षक संजय बांबळे यांच्या मार्गदर्शनात निरीक्षक पाटील, उपनिरीक्षक कृष्णा पाटील, हवालदार किशोर खैरनार, नीतेश चव्हाण, अविनाश गहिवर, कुणाल पानपाटील, उमेश पाटील, प्रवीण पाटील, विशाल पाटील, धीरज सांगळे, सखाराम खांडेकर, राहुल देवरे, रवींद्र राजपूत यांच्या पथकाने ही कारवाई केली.