Dhule Crime News : हाडाखेडला 4 लाखाची तंबाखू जप्त

Dhule Crime News : मध्य प्रदेशातून महाराष्ट्रात तंबाखूची वाहतूक करणारा कंटेनर सांगवी पोलिसांनी शुक्रवारी (ता. २१) रात्री साडेदहाला जप्त केला. या कारवाईत ट्रकसह एकूण तेरा लाख ९६ हजार आठशे रुपये किमतीचा मुद्देमाल पोलिसांनी ताब्यात घेतला असून एकाला अटक केली आहे. सेंधवा येथून शिरपूरकडे कंटेनरद्वारे तंबाखूची अवैध वाहतूक सुरु असल्याची माहिती सांगवीचे सहाय्यक निरीक्षक जयपाल हिरे यांना मिळाली. ()

त्यानुसार पोलिस कॉन्स्टेबल स्वप्नील बांगर, भूषण पाटील, संजय भोई यांना सूचित करून वाहनाचा शोध घेत कारवाईबाबत आदेशित केले असता हाडाखेड (ता. शिरपूर) येथील सीमा तपासणी नाक्यावर सापळा रचून शुक्रवारी (ता.२१) रात्री साडेदहा संशयित कंटेनर (क्रमांक एचआर ४७, ई ५१४०) नाक्यावर आल्यावर पोलिसांनी आडवीत चौकशी केली. वाहनातील मालाबाबत विचारपूस केली असता त्यात बिल पावत्याप्रमाणे माल भरलेला आहे, असे सांगितले.

परंतु वाहनातून तंबाखूजन्य पदार्थांचा वास येत असल्याने पोलिसांचा संशय बळावला. त्यांनी कंटेनरची तपासणी केली. कारवाईत चार लाखांची तंबाखू आणि दहा लाखाचा कंटेनर असा एकूण तेरा लाख ९६ हजार आठशे रुपये किमतीचा मुद्देमाल जप्त केला. याप्रकरणी कंटेनर चालक जमशेद फजर अली (वय ३६, रा. मुछनापट्टी, ता. पुनहाना, जि. नुहुमेवात हरियाणा) याला अटक केली.