Dhule News : तापी नदीपात्रात भाऊ-बहिणीचा बुडून मृत्यू; आजी, आई-वडिलांदेखत घटना

चिमठाणे : सोनेवाडी (ता. शिंदखेडा) येथे बुधवारी (ता. २) सकाळी घरातील कानबाई मातेला अंघोळ घालण्यासाठी तापी नदीवर कुटुंब गेले होते. बहीण-भावाचा बेलपत्र टाकताना पाण्यात बुडून मृत्यू झाला. आजी व आई-वडिलांदेखत ही घटना घडली. रमेश पाटील यांनी मुलगा व पुतणीला वाचविण्याचा प्रयत्न केला, पण पाणी जास्त असल्याने तेही बुडू लागल्याने त्यांना वाचवू शकले नाहीत. सोनेवाडी येथील सुरेश पाटील व रमेश पाटील या दोन्ही भावांचा परिवार घटस्थापनेपूर्वी घरातील कानबाई मातेच्या अंघोळीसाठी तापी नदीकाठावर गेले होते. (Death of brother and sister in Tapi river basin in front of family )

सुरेश पाटील यांची मोठी मुलगी वैष्णवी पाटील (वय १९) व रमेश पाटील यांचा मोठा मुलगा उत्कर्ष पाटील (वय १४) बेलपत्र टाकण्यासाठी पाण्यात उतरले. मात्र, अंदाज न आल्याने ते पाण्यात बुडाले. माहिती मिळताच घटनास्थळी ग्रामस्थांनी धाव घेतली. दोघांचा शोध सुरू केला. एक तासानंतर उत्कर्ष आणि वैष्णवी यांचा तापी नदीपात्रात मृतदेह आढळून आला. त्यांना शिंदखेडा ग्रामीण रुग्णालयात दाखल करण्यात आले. तेथे वैद्यकीय अधिकारी डॉ. भूषण काटे यांनी तपासून त्यांना मृत घोषित केले.

विच्छेदन करून मृतदेह नातेवाइकांच्या ताब्यात देण्यात आले. दुपारी शोकाकुल वातावरणात त्या दोघांवर अंत्यसंस्कार करण्यात आले. वैष्णवी दोंडाईचा येथील अहिंसा महाविद्यालयात इंजिनिअरिंगच्या तिसऱ्या वर्षाला होती, तर उत्कर्ष शिंदखेडा येथील एन. डी. मराठे शाळेत सातवीत शिकत होता. याबाबत ईश्वर पीतांबर सोनवणे (वय ५८) यांनी दिलेल्या माहितीवरून शिंदखेडा पोलिस ठाण्यात आकस्मिक मृत्यूची नोंद झाली आहे. उपनिरीक्षक पांडुरंग जाधव तपास करीत आहेत.

अवैध वाळू उत्खननामुळे बहीण-भावाचा मृत्यू

शिंदखेडा तालुक्यातील तापी नदीपात्रातून मोठ्या प्रमाणात वाळूचा उपसा होत असतो. यामुळे नदीपात्रात मोठमोठे खड्डे पडले आहेत. खड्ड्यात पाण्याचा अंदाज न आल्याने वैष्णवी आणि उत्कर्ष यांचा मृत्यू झाल्याची चर्चा सोनेवाडी ग्रामस्थांमध्ये होती.