Heavy Rain Damage Crop : कापडणेत सलग तिसऱ्या दिवशी मुसळधार! रात्रभर पाऊस; धुळे तालुक्यात शेतकऱ्यांचे नुकसान

कापडणे : परिसरातील कापडणे, धनूर, लोणकुटे, तामसवाडी, हेंकळवाडी, कौठळ, मोहाडी, विश्वनाथ, सुकवद, न्याहळोद, जापी, शिरडाणे, बिलाडी, धमाणे, नगाव, तिसगाव, ढंढाणे, वडेल, रामनगर, सायने, देवभाने, सरवड भागात सलग तिसऱ्या दिवशी मुसळधार पाऊस कोसळला. ऐन सुगीत मुसळधार पाऊस होत असल्याने, शेतकरी वैतागले आहेत. आता तर ‘जा बाबा’, अशी पावसाला आळवणी शेतकरी करीत आहेत. (Farmers loss in heavy rain taluka for crop )

दहा दिवसांच्या खंडानंतर पुन्हा पाऊस सक्रिय झालाय. ९ सप्टेंबरच्या सायंकाळी वादळी वाऱ्यासह मुसळधार कोसळला. १० सप्टेंबरच्या रात्रभर रिमझिम पाऊस सुरू होता. शुक्रवारी (ता. ११) तिसऱ्या दिवशीही दुपारी तीनच्या सुमारास मुसळधार पावसाने हजेरी लावली. सायंकाळी उशिरापर्यंत रिपरिप सुरू होती.

ओल्या कापसाचा भाव चार हजारांवर

कापूस वेचणीच्या ऐन हंगामात पावसाने कापसाचे नुकसान होत आहे. बोंडांतून फुटलेला कापूस जमिनीवर पडत आहे. त्याची प्रतवारी खराब होतेय. काही शेतकऱ्यांचे अधिकचे मजूर लावून कापूस वेचण्याचा प्रयत्नही निष्फळ ठरताहेत. ओल्या कापसाचे दर प्रतिक्विंटल चार हजारांवर आले आहे. शेतकऱ्यां‍मधून मोठी नाराजी व्यक्त होत आहे. (latest marathi news)

मका, बाजरीच्या कणसांना कोंब

मका व बाजरीचे पीक पंधरा दिवसांपासून तयार झालेय. २३ ते ३० सप्टेंबर सलग पाऊस झाल्याने काढणी झाली नाही. आता चार दिवसांपासून कापणी व काढणीला वेग आला होता. पुन्हा पाऊस सुरू झाल्याने मक्याच्या भुणक्यांना व बाजरीच्या कणसांना कोंब फुटू लागले आहेत. मेथी, मुळा, कोथिंबीर आदी भाजीपाल्याचेही मोठे नुकसान झाले आहे.

सरसकट पंचनामे व्हावेत

सततच्या पावसाने पिकांचे नुकसान होत आहे. पंचवीस-तीस टक्केही हंगाम येणार नाही. सरसकट पंचनामे करून, नुकसानभरपाईची मागणी शेतकऱ्यांमधून होत आहे.