![Prof. Dinesh Patil](http://media.assettype.com/esakal%2F2024-06%2F3e7114e3-363d-44be-bda1-5df6a61b39df%2Fdhule_News__42_.jpg?rect=0%2C0%2C1200%2C675&w=480&auto=format%2Ccompress&fit=max)
Dhule News : बहिणीला भेटून घरी परतणाऱ्या प्राध्यापकावर दोन संशयितांनी गोळी झाडल्याची खळबळजनक घटना रविवारी (ता. १०) रात्री साडेदहाला तऱ्हाडी (ता. शिरपूर) गावाजवळ घडली. या गोळीबारात प्रा. पाटील जखमी झाले असून, त्यांना प्रथमोपचारानंतर धुळे येथील खासगी रुग्णालयात दाखल करण्यात आले आहे. शहरातील किसान विद्याप्रसारक संस्थेच्या डॉ. पां. रा. घोगरे कनिष्ठ महाविद्यालयात प्रा. दिनेश रमेश पाटील प्राध्यापक आहेत. ( Firing on Shirpur professor near Tarhadi )
ते भरवाडे (ता. शिरपूर) येथे राहतात. त्यांची बहीण सुलवाडे-सुलतानपूर (ता. शहादा) येथे राहते. तिला भेटण्यासाठी ते गेले होते. बहिणीकडून दुचाकीने ते घरी परत येत होते. तऱ्हाडी गावापासून एक किलोमीटरवर तोरखेडा (ता. शहादा) हद्दीत असताना अचानक दुचाकीवरून आलेल्या दोघांनी त्यांचा पाठलाग सुरू केला. काही कळण्याच्या आतच दुचाकीवरील संशयिताने पिस्तुलातून त्यांच्यावर गोळी झाडली.
पाठीच्या खालील भागात गोळी शिरल्यामुळे प्रा. पाटील जखमी झाले. मात्र त्यांनी तशाही परिस्थितीत भरधाव दुचाकी चालवून तऱ्हाडीपर्यंत नेली. तेथे दुचाकी थांबवून त्यांनी ग्रामस्थांना हल्ल्याबाबत माहिती दिली. तऱ्हाडी विविध कार्यकारी संस्थेचे अध्यक्ष प्रा. प्रशांत पाटील त्यांचे सहकारी असल्याने त्यांना फोन करून माहिती दिली. प्रा. पाटील यांनी वाहनाची व्यवस्था करून जखमी पाटील यांना शिरपूरला आणले.
येथील उपजिल्हा रुग्णालयात प्रथमोपचार केल्यानंतर त्यांना पालिकेच्या इंदिरा गांधी रुग्णालयात दाखल करण्यात आले. वैद्यकीय चाचण्यांमध्ये जखमेनंतर त्यांच्या शरीरात मोठ्या प्रमाणात अंतर्गत रक्तस्त्राव झाल्याचे आढळल्याने त्यांना धुळे येथील खासगी रुग्णालयात दाखल करण्यात आले. किविप्र संस्थेचे विश्वस्त रोहित रंधे यांनी त्यांची भेट घेऊन विचारपूस केली. सारंगखेडा पोलिस ठाण्यात अज्ञात संशयितांविरोधात गुन्हा दाखल झाला आहे.
संशयित फरारी
अंधार असल्यामुळे संशयित कोण होते, त्याबाबत प्रा. दिनेश पाटील काहीही सांगू शकले नाहीत. गोळी झाडल्यानंतर काही अंतर पाठलाग करून संशयित माघारी फिरले. त्यामुळे संशयितांचा हेतू लुटमारीचा नव्हता हे उघड आहे. प्रा. पाटील यांच्यावर कोणत्या कारणामुळे गोळीबार झाला, गोळीबार करणारे कोण होते, त्यांनी इतके टोकाचे पाऊल का उचलले, असे अनेक प्रश्न यानिमित्ताने उपस्थित झाले आहेत.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.