Dhule Fraud Crime : बनावट जातीच्या प्रमाणपत्राद्वारे ‘कोतवाल’ची मिळविली नोकरी

Dhule Fraud News : दिवी (ता. शिंदखेडा) येथील महसूल सज्जा असलेल्या गाव कोतवालाचे पद हे खोटे ‘भामटा राजपूत’ जातीच्या प्रमाणपत्राच्या आधारावर राहुल प्रेमसिंह गिरासे याने घेतल्याची तक्रार काशीनाथ शंकर पवार यांनी जिल्हाधिकाऱ्यांकडे केल्याने कोतवालपद वादात अडकले.

तक्रार झाल्याने महसूल विभागात खळबळ उडाली आहे.

बुराई नदीवरील वाडी-शेवाडी मध्यम प्रकल्पामुळे दिवी गावाचे पुनर्वसन झाले आहे. शिंदखेडा तालुक्यात कोतवाल भरतीत काही उमेदवारांनी खोटे जात प्रमाणपत्र सादर केल्याची शंका उपस्थित करत चौकशीची मागणी श्री. पवार यांनी केली.

या संदर्भात मुख्यमंत्र्यांसह महसूलमंत्री व जात प्रमाणपत्र पडताळणी समितीकडेही पवार यांनी तक्रार दाखल केली आहे. राहुल गिरासे याने राजपूत भामटा जातीचे प्रमाणपत्र मिळविण्यासाठी नोंदी बदलण्यात येऊन बनावट दस्तऐवज तयार केले आहे.

तसेच खोटे जात प्रमाणपत्र सादर करणाऱ्यांवर फौजदारी स्वरूपाचे गुन्हे दाखल व्हावेत, यासाठी जात पडताळणी समितीकडे आक्षेप नोंदविला आहे. खोटे लाभार्थी विमुक्त भटक्या जातीचे लाभ घेत असून, खरे लाभार्थी आरक्षणापासून वंचित राहत असल्याचे पवार यांनी तक्रारीत नमूद केले आहे.