Dhule Chemical Tadi Crime: केमिकलयुक्त ताडीचा ‘गोरखधंदा’! शिंदखेडा तालुक्यात आंध्रप्रदेशातील यादगिरीची ‘ताडीगिरी’

Dhule Chemical Tadi Crime : शिंदखेडा तालुक्यात शिंदखेडा व दोंडाईचा येथे ताडी विक्री केंद्राचे शासकीय परवाने दिले आहेत. मात्र, केमिकलयुक्त ताडी विक्रीची अनेक केंद्र तालुक्यात थाटले आहेत. या अवैध ताडी विक्रीकडे राज्य उत्पादन शुल्क विभागाने कानाडोळा केल्याने आंध्रप्रदेशातील ‘यादगिरी आण्णाची’ ताडी विक्रीतील दादागिरी वाढली आहे.

तालुक्यातील तरूण ‘क्लोरल हायड्रेट’ केमिकलयुक्त ताडीचे व्यसनाधिन झाल्याने काहींनी या जगाचा निरोप घेतला. तर काही तरूण मृत्यूशी झुंज देत आहेत. संबंधित ताडी विक्रेत्यांवर अन्न आणि औषध प्रशासन विभाग कारवाई करेल का, याकडे तालुक्याचे लक्ष लागले आहे.

शिंदखेडा तालुक्यात ‘क्लोरल हायड्रेट’ केमिकलयुक्त ताडीची विक्री शहरासह तालुक्यातील खेड्यात मोठ्या प्रमाणावर होत आहे. या गोरखधंद्यात आंध्रप्रदेशातील ‘यादगिरी आण्णाने’ तालुक्यात चांगलाच जम बसविल्याने मध्यम, वयस्करांसह तरूण वर्ग या ताडीकडे आकर्षित झाल्याने केमिकलयुक्त ताडीची मोठ्या प्रमाणात विक्री केली जात आहे.

अनेक तरूणांचा मृत्यू

शिंदखेडा तालुक्यात गेल्या दोन वर्षांच्या कार्यकाळात केमिकलयुक्त ताडीमुळे अनेक जणांचे संसार उद्ध्वस्त झाले. तर काहींचा मृत्यू झाला आहे. अनेक तरूणांना कायमस्वरूपी अपंगत्व आल्याने ते अंथरूणावर खिळून आहेत. केमिकलयुक्त ताडीविरोधात लोकप्रतिनिधी व सामाजिक संघटनांनी आवाज उठवून तालुक्यातून केमिकलयुक्त ताडी हद्दपार केली पाहिजे. या ताडीच्या आहारी गेलेल्यांना आरोग्याशी संबंधित सेवाभावी संस्थांनी प्रबोधन केले पाहिजे. (latest marathi news)

उत्पादन शुल्क व अन्न-औषधकडून कारवाई नाही

राज्य उत्पादन शुल्क विभाग आणि शिंदखेडा, दोंडाईचा व नरडाणा पोलिसांनी तालुक्यातील गावांमध्ये बिनबोभाट सुरू असलेल्या केमिकलयुक्त ताडी विक्री केंद्रावर कारवाई केली गेली पाहिजे. तसेच, अन्न व औषध प्रशासनाने शिंदखेडा व दोंडाईचा येथील परवानाधारक ताडी विक्री केंद्रावरील ताडीचे नमुने घेवून ते नमुने उच्च प्रयोगशाळेत तपासणीसाठी पाठवायला हवे, अशी मागणी नागरीक करीत आहेत.