Dhule News : अखेर टोलनाक्यावरील कामगारांना न्याय!

Dhule News : शिवसेनेचे नेते मंत्री दादा भुसे व शिवसेना जिल्हाप्रमुख मनोज मोरे यांच्या पुढाकाराने लळिंग टोलनाक्यावरील कामगारांना थकीत वेतन अदा करण्यासह कामावर रुजू करण्याचे लेखी आश्‍वासन टोल कंपनीकडून मिळाले. शिवसेनेच्या या आंदोलनाला राष्ट्रवादी काँग्रेस, मनसे, भाजपने पाठिंबा दिला होता. (Justice for workers at toll booth)

अवधान शिवारातील इरकॉन-सोमा टोल कंपनीचे गस्तीपथकातील कर्मचारी कुणाल संजय फरताडे, पवन पिरन गवळी, कार्तिक अशोक मराठे, वैभव जितेंद्र शिंदे, मोहन संतोष उदीकर, गणेश हिरामण थोरात, भगवान खैरनार अशा सात कामगारांना सहा महिन्यांपूर्वी नव्याने नेमणूक झालेल्या कंत्राटदारामार्फत टोल कंपनीने कामावरून कमी केले.

१३५+७ अशा कामगार कर्मचाऱ्यांच्या ठेक्यात या ना त्या तांत्रिक अडचणी दर्शवून या कामगारांना कामगारांना काम नाकारले जात होते. या प्रकरणी संबंधित टोल कामगार कर्मचाऱ्यांनी शिवसेना जिल्हाप्रमुख मोरे यांच्याकडे न्याय मिळवून देण्याची मागणी केली. श्री. मोरे यांनी मंत्री दादा भुसे यांची मालेगाव येथे या संदर्भात भेट घेऊन संबंधित कामगारांना न्याय मिळवून देण्याची विनंती केली. (latest marathi news)

मंत्री श्री. भुसे यांनी तत्काळ इरकॉन सोमा टोल कंपनीचे दिल्ली येथील संचालक मंडळाचे सदस्य मसूद खान यांच्याशी संपर्क साधून कामगारांवर अन्याय होऊ देऊ नये, असे सूचित केले. मात्र, त्यानंतरही लळिंग टोल कंपनीच्या प्रशासकीय अधिकाऱ्यांकडून सकारात्मक प्रतिसाद मिळाली नाही. त्यामुळे अन्यायग्रस्त टोल कामगार कर्मचाऱ्यांनी श्री. मोरे यांच्या मार्गदर्शनाने टोल कंपनीच्या प्रवेशद्वारावर लक्षवेधी साखळी उपोषण सुरू केले.

कामगारांमध्ये समाधान

आंदोलनस्थळी शिवसेनेचे नंदुरबार, धुळे संपर्कप्रमुख माजी आमदार चंद्रकांत रघुवंशी, जिल्हाप्रमुख मोरे, महानगरप्रमुख संजय वाल्हे, सारांश भावसार, पवन शिंदे, शेखर बडगुजर, कल्पेश चव्हाण, मयूर बोरसे, सनी मोरे, राजेश वाणी, पराग सामोरे, दीपक बडगुजर आदींनी भेट दिली. दरम्यान, आंदोलन सुरू केल्यानंतर दोनच तासांत लळिंग टोल कंपनीचे सीईओ यांनी कामगारांना कामावर घेण्याचे लेखी आश्वासन देऊन आंदोलन थांबविण्याची विनंती केली. न्याय मिळाल्याने संबंधित कामगारांनी समाधान व्यक्त केले.