Dhule Crime News : सराईत चोरट्यांना ‘मिनी मोक्का’; धुळ्यातील देवपूर पोलिसांकडून राज्यातील पहिली कारवाई

Dhule News : राज्यात येथील देवपूर पोलिस ठाण्याकडून दोन सराईत चोरट्यांवर मिनी मोक्कांतर्गत पहिलीच कारवाई झाली. देवपूरचे पोलिस शोधपथक, तपासी अंमलदारांनी ही कारवाई केली. सुधारित कलमान्वये संघटित गुन्हे करणाऱ्या दोघा चोरट्यांना गजाआड केले आहे. त्यांच्याकडून वीजमोटार व बॅटरी, असा आठ हजारांचा मुद्देमाल जप्त केला.

अशा किरकोळ संघटित गुन्हेगारीत सरासरी एक ते सात वर्षांपर्यंतच्या शिक्षेचे प्रयोजन आहे. देवपूरमधील तुषार रघुनाथ वाळके यांच्या घराच्या कंपाउंडमधून चोरट्याने २२ जुलैला रात्री पाण्याची वीजमोटार लंपास केली. याप्रकरणी देवपूर पोलिस ठाण्यात गुन्हा दाखल झाला. हवालदार विश्वनाथ शिरसाट तपास करीत होते.

तपासात शोधपथकाचे सहायक उपनिरीक्षक मिलिंद सोनवणे यांना तौसिफ भिकन तांबोळी (वय २०, रा. मास्तरवाडी, देवपूर) व समीर ऊर्फ फारगेट रफिक पठाण (२४, रा. वीटाभट्टी, देवपूर) हे संशयित एक बॅटरी संशयास्पद पद्धतीने नेताना दिसले. दोघांची चौकशी केली असता त्यांनी प्रथम उडवाउडवीची उत्तरे दिली. मात्र, पोलिसी खक्या दाखविल्यावर दोघांनी गुन्ह्याची कबुली दिली. (latest marathi news)

पोलिसांनी मोटार जप्त केली. तसेच त्यांच्याकडे मिळालेल्या बॅटरीबाबत चौकशी केली असता दोघांनी ती २३ जुलैला रात्री दत्तमंदिर चौकातील (राजेश्वर कॉलनी) मोकळ्या जागेत अ‍ॅपेरिक्षातून (एमएच ०२ वायए २६३०) चोरल्याची कबुली दिली. त्यानुसार गुन्हा दाखल केला. दोघा संशयितांना अटक केली. त्यांच्याकडून वीजमोटार व बॅटरी, असा एकूण आठ हजारांचा मुद्देमाल जप्त केला.

१ जुलैपासून लागू नवीन कायद्यान्वये राज्यात देवपूर पोलिस ठाण्याकडून प्रथमच ही कारवाई करण्यात आली. जिल्हा पोलिस अधीक्षक श्रीकांत धिवरे, अपर पोलिस अधीक्षक किशोर काळे, पोलिस उपअधीक्षक एस. हृषीकेश रेड्डी यांच्या मार्गदर्शनाखाली देवपूरचे पोलिस निरीक्षक धनंजय पाटील, उपनिरीक्षक राजेश इंदवे, सहाय्यक उपनिरीक्षक मिलिंद सोनवणे, श्री. आखाडे, हवालदार विश्वनाथ शिरसाट, रामकृष्ण माळी, राहुल गुजाळ, सौरभ कुटे, भटेंद्र पाटील यांच्या पथकाने ही कारवाई केली.