Dhule News : विखरणचा पाझर तलाव भरला; डझनभर गावे टँकरमुक्त

Dhule News : विखरण (देवाचे) येथील पाझर तलाव चौदा ते पंधरा वर्षांनी भरला. त्यामुळे आगामी दोन वर्ष परिसरातील डझरभर गावे टँकरमुक्त होणार असून, रब्बीच्या पिकांचीही हमी वाढली आहे. दुसरीकडे पिण्याच्या पाण्याचा प्रश्‍न सुटल्यामुळे बळीराजा समाधानी झाला आहे. विखरण हे शिंदखेडा तालुक्यातील अवर्षणप्रवण क्षेत्रातील कायमस्वरूपी दुष्काळी छायेतील पाणीटंचाईचे चटके सहन करणारे गाव आहे. (percolation pond at Vikharan filled)

येथे ३० ते ३५ एकर क्षेत्रात पाझर तलाव आहे. हा तलाव दीड दशकापासून पुरेशा पर्जन्यमानाअभावी कोरडाठाक होता. त्यामुळे जनावरांच्या चाऱ्यासाठीच केवळ या तलावाचा वापर होत. येथे पिण्याच्या पाण्याची भीषण टंचाई होती.

विहिरींनीही तळ गाठला होता. त्यामुळे पाच ते सात वर्षांपासून रब्बी पिकांपासून शेतकरी दुरावला होता. परिणामी, रोजगारासाठी अनेकांनी गुजरात राज्याकडे स्थलांतर केले होते. यावर्षी श्री द्वारकाधीश मंदिराच्या पाठीमागील तलाव २० जुलैपर्यंत भरल्यामुळे बळीराजा सुखावला आहे. (latest marathi news)

येथे आज पर्यंत ३५० मिमी पाऊस झाल्याची नोंद आहे. त्यामुळे पिकनिहाय स्थिती समाधारक आहे. विखरण परिसरातील शेतकऱ्यांचा रब्बी हंगामही जोरात राहणार आहे. तलाव पूर्ण क्षमतेने भरल्यामुळे दोन वर्षापर्यंत पिण्याच्या पाण्याचा प्रश्‍न सुटणार असल्याचे स्थानिकांकडून सांगितले जात आहे.