Dhule News : महागडे मोबाईल मालकाला परत; महामार्गावर गवसल्यानंतर खाकी वर्दीतील प्रामाणिकपणा

Dhule News : खाकी वर्दीतील प्रामाणिकपणा एका महागड्या मोबाईल परतीवरून अधोरेखित झाला. महामार्गावर गस्तीवर असताना पोलिस शिपाई चेतन माळी यांना दोन महागडे मोबाईल सापडले. त्यांनी मूळ मालकाचा शोध घेत त्यांना दोघे मोबाईल परत केले. मोबाईल मालकांनी पोलिसांचे आभार मानत कौतुकही केले. ( police find mobile phone and return to owner )

शिंदखेडा पोलिस ठाण्याचे सहाय्यक निरीक्षक प्रशांत गोरावडे, पोलिस शिपाई भारत मोहिते, चालक पोलिस शिपाई चेतन माळी आणि पोलिसमित्र चेतन पाटील गस्तीवर होते. शिरपूर टोलनाक्याजवळ महामार्गावर पोलिस शिपाई चेतन माळी यांना ॲपल आणि रियल मी कंपनीचा, असे एकूण सव्वादोन लाख किमतीचे दोन मोबाईल सापडले.

ते सुस्थितीत होते. पोलिस शिपाई माळी व सहकाऱ्यांनी मूळ मालकाचा शोध घेतला. त्यानुसार मालक प्रथमेश संजय अहिरे (रा. नकाणे रोड, धुळे) यांना त्यांचे हरवलेले दोघेही मोबाईल परत केले. शिंदखेडा पोलिस ठाण्याचे निरीक्षक दीपक पाटील, कर्मचारी व नागरिकांनी चेतन माळी, भारत मोहिते व पोलिसमित्र चेतन पाटील यांचे कौतुक केले.