Dhule News : वाहतूक शाखेने बुलेटस्वारांचा कर्णकर्कश आवाज केला बंद; 35 वाहनधारकांवर दंडात्मक कारवाई

Dhule News : शहर वाहतूक पोलिस शाखेने बुधवारी (ता.२६) शहरातील बुलेटस्वारांचा कर्णकर्कश आवाज बंद केला. यात ३५ वाहनधारकांवर कारवाई करीत सायलेन्सर जप्त केले. तसेच त्यांच्याकडून ३५ हजारांचा दंड वसूल केला. शहरात बुलेटला विचित्र सायलेन्सर लावत कानठळ्या बसविणाऱ्या कर्णकर्कश आवाजाच्या वाहनचालकांची संख्या वाढली आहे. त्याचा नागरिकांना मोठ्या प्रमाणात त्रास होत आहे. ते लक्षात घेत शहर वाहतूक शाखेचे सहाय्यक पोलिस निरीक्षक भूषण कोते व पथकाने बुधवारी (ता.२६) सकाळी नऊ ते दुपारी एकपर्यंत शहरात विविध ठिकाणी विशेष तपासणी मोहीम राबविली. ( traffic branch stopped shrill sound of bullet riders )

कठोर कारवाईची गरज

शहरातील जयहिंद ज्युनिअर कॉलेज परिसर, दत्त मंदिर चौक, महाजन हायस्कूल, संतोषीमाता चौक, बारापत्थर, मामलेदार कचेरी चौक आदी वर्दळीच्या ठिकाणी ही मोहीम राबविण्यात आली. बुलेटच्या सायलेन्सरची तपासणी केली. त्यात एकूण ३५ वाहनधारकांनी त्यांच्या वाहनास कर्णकर्कश आवाज करणारे सायलेन्सर बसविल्याचे आढळले. त्यांच्यावर मोटार वाहन कायद्यान्वये कारवाई केली.

तसेच त्यांच्याकडून ३५ हजारांचा दंड वसूल केला. या प्रकरणी कठोर कारवाईत सातत्य ठेवण्याची नागरिकांची मागणी आहे. पोलिस अधीक्षक श्रीकांत धिवरे, अपर पोलिस अधीक्षक किशोर काळे यांच्या मार्गदर्शनाखाली ही कारवाई झाली. बुलेटधारकांनी वाहतूक नियमांचे पालन करावे. सायलेन्सरमध्ये कोणताही अनावश्यक बदल करू नये, असे आवाहन कोते यांनी केले.