Dhule Unseasonal Rain : दुसऱ्या दिवशीही अवकाळी पाऊस; काढणीला आलेल्या पिकांचे नुकसान

Dhule Unseasonal Rain : शिंदखेडा तालुक्यात अवकाळी पाऊस व वादळी वाऱ्यासह गुरुवारी (ता. ६) व शुक्रवारी (ता. ७) झालेल्या पावसामुळे काढणीला आलेल्या गहू, हरभरा, मका, कांदा, ज्वारी, दादर, पपई, केळी व चाऱ्याचे मोठ्या प्रमाणावर नुकसान झाले. (Dhule Unseasonal Rain Damage to harvested crops news)

तसेच शेताच्या बांधावरील व रस्त्यावरील लागून असलेली दुतर्फा झाडे वादळामुळे उन्मळून पडली. शिंदखेडा तहसील कार्यालयांतर्गत येणाऱ्या चिमठाणे, शिंदखेडा व वर्षी महसूल मंडळांत १५ मिलिमीटर पावसाची नोंद झाली.

शुक्रवारी (ता. ७) शिंदखेडा तालुक्यातील शिंदखेडा, वरूळ-घुसरे, परसामळ, भडणे, हातनूर, अलाणे, दरखेडा, चिमठाणे, साळवे, दलवाडे (प्र. सोनगीर) वर्शी आदी परिसरात सकाळपासून प्रचंड उकाडा जाणवत होता. त्यात अचानक मोठ्या प्रमाणात वादळ सुरू होऊन विजेच्या कडकडाटासह तुरळक पावसाला सुरवात झाली.

त्यात अनेक शेतकऱ्यांच्या शेतातील गहू, हरभरा, मका, कांदा, दादर, रब्बी ज्वारी कापणीला व काहींची काढणी सुरू होती. त्यात अचानक आलेल्या वादळाने व पावसाने शेतकऱ्यांसह मजुरांची तारांबळ उडाली. वादळामुळे केळी व पपईचे झाड उन्मळून पडून शेतकऱ्यांचे नुकसान झाले.

हेही वाचा : सामान्यांचा पैसा सुरक्षित ठेवण्यासाठीच Virtual Currency करकक्षेत

शिंदखेडा तहसील मंडळातील शनिवारी (ता. ८) सकाळी सातपर्यंत झालेला पाऊस, त्यात शिंदखेडा मंडळ सहा मिलिमीटर, चिमठाणे मंडळ पाच मिलिमीटर व वर्शी मंडळ चार मिलिमीटर अशी एकूण १५ मिलिमीटर पावसाची नोंद झाली.

तालुक्यात १५ दिवसांपूर्वी अवकाळी व वादळी वाऱ्यासह झालेल्या गारपिटीमुळे रब्बी पिकांचे नुकसान झाले होते. मात्र त्या वेळीही पंचनामे झाले नाहीत. आता तरी महसूल विभागाने पंचनामे करावेत, अशी मागणी शेतकरी करीत आहेत.