Dhule News : डोंगरगावच्या शेतकऱ्याची रेल्वेखाली आत्महत्या

Dhule News : डोंगरगाव (ता. शहादा) येथील शेतकरी प्रेमसिंग रतनसिंग गिरासे (वय ५७) यांनी रामी-पथारे शिवारात धावत्या रेल्वेखाली झोकून देत आत्महत्या केली आहे.

कर्जबाजारी व नापिकीमुळे त्यांनी जीवन संपविल्याचे सांगण्यात येत आहे. शनिवारी (ता. १७) सकाळी ही घटना घडली असून, त्याबाबत हळहळ व्यक्त होत आहे. (farmer of Dongargaon committed suicide under train dhule news)

रामी-पथारे (ता. शिंदखेडा) शिवारात दोंडाईचापासून काही किलोमीटरवर रेल्वेरुळावर छिन्नविछिन्न अवस्थेत मृतदेह असल्याची माहिती दोंडाईचा पोलिसांना मिळाल्याने त्यांनी धाव घेतली. घटनास्थळी नागरिकांनी गर्दी केली होती.

पोलिसांनी पंचनामा करत मृतदेह उत्तरीय तपासणीसाठी पाठविला. तपासाअंती तो डोंगरगाव येथील प्रेमसिंग रतनसिंग गिरासे यांचा असल्याचे स्पष्ट झाले.

हेही वाचा : Credit Card फसवणूक....काय घ्याल काळजी?

प्रेमसिंग गिरासे हे शेतीवरच उदरनिर्वाह करीत होते. मात्र काही वर्षांपासून निसर्गाची साथ मिळत नसल्याने ते कर्जाच्या ओझ्याखाली दबले होते. वेळेत कर्जाची परतफेड करता न आल्याने त्यांच्याकडे तगादा सुरू होता. त्यातून ते खचून गेले होते.

त्यातूनच त्यांनी आत्महत्या केल्याचे नातेवाइकांनी सांगितले. घटनेची माहिती मिळताच डोंगरगाव येथील नातेवाईक दोंडाईचा येथे उपजिल्हा रुग्णालयात दाखल झाले. दोंडाईचा पोलिस ठाण्यात अकस्मात मृत्यूची नोंद करण्यात आली आहे. पोलिस निरीक्षक श्रीराम पवार यांच्या मार्गदर्शनाखाली तपास सुरू आहे.