बऱ्हाणपूर-अंकलेश्वर महामार्गावर गुटखा जप्त

खापर : बऱ्हाणपूर-अंकलेश्वर महामार्गालगत येथील ओम शांती गुरू किराणा दुकानात स्थानिक गुन्हे शाखेने छापा टाकून पान मसाला व तंबाखू जप्त केला. एक लाख ८१ हजार आठशे रुपयांचा मुद्देमाल जप्त करण्यात आला. अक्कलकुवा तालुक्यातील खापर येथे स्थानिक गुन्हे शाखेकडून ही कारवाई करण्यात आली.

पोलिस नाईक मनोज सुदाम नाईक यांनी फिर्याद दिली आहे. त्यात महाराष्ट्र राज्यात पान मसाला व तंबाखू विक्रीवर प्रतिबंध असताना खापर येथील ओम शांती किराणा दुकानात विमल पान मसाला व तंबाखूची विक्री होत असल्याची माहिती स्थानिक गुन्हे शाखेला मिळाल्याने शुक्रवारी (ता.३) दुपारी तीन वाजेच्या सुमारास सुमारास छापा टाकण्यात आला. कारवाई दरम्यान माल बाळगणे व विक्री प्रकरणी आशिष रमेशचंद जैन (वय ३२) व दलपतसिंग लालसिंग राजपुरोहित दोघे राहणार खापर यांच्यावर अक्कलकुवा पोलिस ठाण्यात गुन्हा दाखल करण्यात आला. पुढील तपास राजेश गावित करीत आहे.