Nandurbar News : मंजूर कामांची स्थगिती उच्च न्यायालयाने उठविली

Nandurbar News : प्रादेशिक पर्यटन विकास योजनेंतर्गत मंजूर झालेल्या कामांची उच्च न्यायालयाने स्थगिती उठविली आहे.

त्यामुळे नंदुरबार तालुक्यातील साडेसाती मुक्ती श्रीक्षेत्र शनिमांडळचा विकास होणार असून, त्यासाठी तीन कोटी नऊ लाख ९३ हजार रुपयांच्या निधीला प्रशासकीय मान्यता मिळाल्याची माहिती शिवसेनेचे नेते तथा माजी आमदार चंद्रकांत रघुवंशी यांनी दिली. (High Court lifted stay on works approved under Tourism Development Scheme nandurbar news)

याबाबत माजी आमदार रघुवंशी यांनी सोमवारी काढलेल्या प्रसिद्धीपत्रकात म्हटले आहे, की पर्यटन व सांस्कृतिक कार्य विभागाच्या प्रादेशिक पर्यटन विकास योजनेंतर्गत पर्यटनस्थळांच्या ठिकाणी पायाभूत सुविधा पुरविण्यासाठी निविदा मागविण्यात आल्या होत्या.

त्यानंतर काही निविदांना तांत्रिक अडचणी आल्या होत्या. त्यामुळे कामांना स्थगिती देण्यात आली होती; परंतु आता उच्च न्यायालयाच्या आदेशाने सरसकट स्थगिती उठविण्यात आलेली आहे.

कामात कोणत्याही प्रकारची अनियमितता होणार नाही याची दक्षता घेण्यात यावी, असे पर्यटन व सांस्कृतिक कार्य विभागाचे उपसचिव यांनी काढलेल्या परिपत्रकात नमूद करण्यात आले आहे.

संपूर्ण महाराष्ट्रात प्रसिद्ध असलेल्या एकमेव साडेसाती मुक्तिपीठ श्रीक्षेत्र शनिमांडळ येथे पर्यटन विकास विभागाकडून विकासकामांना लवकरच सुरवात करण्यात येणार आहे.

त्यामुळे शनिभक्तांमध्ये आनंदाचे वातावरण आहे. काही तांत्रिक मुद्द्यांमुळे कामांच्या निविदांना स्थगिती देण्यात आली होती. त्यामुळे विकासकामे होऊ शकली नाहीत.

आता उच्च न्यायालयानेच स्थगिती उठविल्यामुळे विकासकामे होतील. शनिमांडळ गावातील नदी ते शनी मंदिरापर्यंत ट्रिमिक्स पद्धतीने रस्ता तयार करणे, मंदिर चौक सिमेंट ट्रिमिक्स करणे त्याचप्रमाणे गावातील रस्त्यांवर पथदीप बसविण्यात येतील.

त्यासाठी तीन कोटी नऊ लाख ९३ हजार रुपयांची प्रशासकीय मान्यता देण्यात आल्याचे शिवसेनेचे नेते तथा माजी आमदार चंद्रकांत रघुवंशी यांनी सांगितले.