Maratha Reservation : मराठा आरक्षणाचे लोण महाराष्ट्रात पसरले असून, विविध ठिकाणी उपोषण व आंदोलने केली जात आहेत. त्या पार्श्वभूमीवर शहादा येथे मराठा समाजाला आरक्षण मिळावे व मराठा आरक्षणासाठी लढणारे मनोज जरांगे पाटील यांना पाठिंबा म्हणून सकल मराठा समाज शहादा तालुका यांच्यातर्फे साखळी उपोषण सुरू करण्यात आले आहे.( hunger strike started for Maratha reservation in shahada nandurbar news)
साखळी उपोषणाची सुरवात छत्रपती शिवाजी महाराजांच्या पुतळ्यास हार अर्पण करून करण्यात आली. शहरातील प्रांताधिकारी कार्यालयाबाहेर बुधवारपासून साखळी उपोषणाला सुरवात करण्यात आली. तीन दिवस साखळी उपोषण करण्यात येणार आहे.
प्रशासनाला दिलेला निवेदनात म्हटले आहे, की सर्व मराठा समाजाला सरसकट कुणबी दाखले देण्यात यावेत. अनेक वर्षांपासून वंचित राहिलेल्या मराठा समाजाला आरक्षण देण्यात यावे. मराठा आंदोलनादरम्यान दाखल झालेले गुन्हे तत्काळ मागे घ्यावेत. महाराष्ट्रातील तमाम मराठा समाज हा शैक्षणिक, आर्थिक व सामाजिकदृष्ट्या अत्यंत मागास राहिलेला आहे.
राज्यातील सर्वांत मोठा बहुसंख्य समाज असूनसुद्धा या समाजातील असंख्य युवक रोजगारापासून वंचित राहिलेले आहेत. यामुळे मराठा समाज आर्थिकदृष्ट्या व शैक्षणिकदृष्ट्या खूपच मागास राहिलेला आहे. अनेक तरुण गरिबी व बेरोजगारीमुळे आत्महत्या करीत आहेत. असे अनेक प्रश्न समाजाला भेडसावत असून, शासनाने तत्काळ सर्व मराठा समाजाला कुणबी म्हणून सरसकट आरक्षण द्यावे, अशी मागणी करण्यात आली आहे.
शासनाने आरक्षणासंदर्भात निर्णय घेण्यासाठी ३० दिवसांचा अवधी मागितला होता. मात्र ४० दिवस होऊनही आरक्षणावर ठोस निर्णय न झाल्याने महाराष्ट्रभर मराठा समाजातर्फे आंदोलने, निदर्शने करण्यात येत आहेत. आरक्षणासाठी लढणारे मनोज जरांगे पाटील यांनी अन्न व पाणी त्यागल्याने त्यांची तब्येत खालावत असल्याने संपूर्ण महाराष्ट्रात मराठा समाजबांधवांना त्यांची काळजी आहे. म्हणून शासनाने मराठा समाजाला आरक्षण द्यावे, अशी मागणी समाजातर्फे करण्यात येत आहे.
एन. डी. पाटील, चतुर्भुज शिंदे, ॲड. सरजू चव्हाण, सागर मराठे, नीलेश मराठे यांसह समाजबांधवांनी सकाळी नऊपासून साखळी उपोषणाला सुरवात केली. समाजबांधव मोठ्या संख्येने उपस्थित होते. उपोषणस्थळी अनेक राजकीय पक्ष, विविध सामाजिक संघटना आदींनी येऊन उपोषणाला पाठिंबा दर्शविला आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
