Dhule News : बुधबाजारात व्यवसाय थाटल्यास साहित्य जप्त; पुढच्या बुधवारपासून कारवाई

Dhule News : शहरातील देवपूर बसस्थानकाजवळ बुधबाजार भरविला जातो. यामुळे रहदारीचा रस्ता बंद होऊन नागरिकांची गैरसोय होते.

त्यामुळे येत्या बुधवारपासून तेथे कोणताही व्यवसाय करू नये अन्यथा संबंधित विक्रेत्यांच्या वस्तू, साहित्य महापालिका अतिक्रमण निर्मूलन पथकाकडून जप्त केले जाईल, असा इशारा महापालिकेतर्फे देण्यात आला आहे. (If business is established in Budh Bazar materials will be confiscated dhule news)

शहरातील देवपूर बसस्थानकाजवळ दर बुधवारी बाजार भरविला जातो. बुधबाजार या नावाने हा बाजार प्रसिद्ध आहे. या बुधबाजारात मोठ्या प्रमाणावर छोटे विक्रेते मोकळ्या जागेत तसेच रस्त्यावर दुकाने थाटतात. ग्राहकांचीही मोठी गर्दी या बाजारात खरेदीसाठी उसळते. त्यामुळे या भागात वाहतूक कोंडीची समस्या निर्माण होते.

दरम्यान, महापालिका आयुक्त अमिता दगडे-पाटील यांच्या आदेशाने महापालिकेतर्फे बुधबाजाराच्या ठिकाणी कुणीही व्यवसाय करू नये, असे आवाहन करण्यात आले आहे. बुधबाजार येथील तात्पुरते दुकाने, पथाऱ्या टाकून व्यवसाय करणाऱ्या सर्व संबंधित व्यावसायिकांना याबाबत इशारा देण्यात आला आला.

बसस्थानकालगत रस्त्यावर तसेच मोकळ्या भूखंडावर रस्त्यांपैकी जमीन बुधवारी बाजार थाटल्याने रहदारीचा रस्ता बंद करून नागरिकांची गैरसोय होत होते. त्यामुळे येत्या बुधवारपासून तेथे कुणीही व्यवसाय करू नये व नागरिकांना त्रास होईल असे कृत्य करू नये. तसे झाल्यास संबंधितांच्या वस्तू व साहित्य मनपा अतिक्रमण निर्मूलन पथकामार्फत जप्त करण्यात येईल याची नोंद घ्यावी, असे धुळे महापालिकेतर्फे प्रसिद्धीस दिलेल्या निवेदनात म्हटले आहे.

कारवाईनंतर ‘जैसे थे’ स्थिती

बुधबाजारामुळे निर्माण होणाऱ्या समस्येवर यापूर्वीही महापालिकेतर्फे कारवाई करण्यात आली आहे. मात्र, शहरातील इतर भागात होणाऱ्या तात्पुरत्या कारवायांसारखीच ही कारवाईदेखील तात्पुरती ठरली आहे. कारवाईनंतर पुढच्या बुधवारी पुन्हा तेथे बाजार भरतो व परिस्थिती ‘जैसे थे’ पाहायला मिळते. त्यामुळे आता महापालिका आयुक्तांच्या या नव्या आदेशाने किती फरक पडेल यावर प्रश्‍नचिन्हच आहे.